“Biz bu gün insan kapitalına sərmayə yatırırıq” - YENİLƏNİR

İlham Əliyev: “TANAP ən azı 100 il Avropanın enerji təhlükəsizliyində mühüm rol oynayacaq”

Azərbaycan prezidenti İlham Əliyev «Cənubi Qafqazın və Mərkəzi Asiyanın gələcəyi ilə bağlı Strateji Dialoq» mövzusunda bu gün Bakıda işinə başlayan I Dünya İqtisadi Forumunda (Davos Forumu) açılış nitqi ilə çıxış edib.

Tədbir iştirakçılarına təşəkkürünü bildirən dövlət başçısı Davos Forumunda 7 dəfə iştirak etdiyini xatırladıb, bildirib ki, Bakı Forumu Azərbaycan haqqında anlayışı olmayan şirkətləri məlumatlandırmaq baxımından mühüm əhəmiyyət daşıyır: “Müstəqilliyimizin 20 yaşı var. 90-cı illərin əvvəlində Azərbaycanın vəziyyəti yaxşı deyildi. Sovet ittifaqının süqutundan sonra problemlərimiz, daxildə çaxnaşmalar vardı, Ermənistan tərəfindən ərazilərimiz işğal edilmişdi”.

Azərbaycanda enerji sektorunda görülən işlərdən danışan prezident İlham Əliyev bildirib ki, enerji sahəsində bir sıra islahatlar aparılıb: “Bu, bazar iqtisadiyyatına keçid idi. Azərbaycan islahatlara başladığı zaman enerji sektoruna investorları cəlb edə bildi. Sonrakı mərhələdə biz iqtisadi inkişafımızı enerji sahəsindən qeyri-enerji sektoruna yönəltdik. İqtisadi və siyasi islahatlara sərmayə qoyduq və bu proses bu gün də davam edir. Bizim əlverişli coğrafi mövqeyimiz var. Biz karbohidrogen mənbələrimizin çoxşaxəli daşınma marşrutlarını yaratmışıq. Yeddi neft və qaz kəmərimiz var. Eyni zamanda Xəzər sahilindəki digər tərəfdaşlarımıza da onların karbohidrogen ehtiyatlarının daşınmasına dəstək veririk”.

Ölkədə yoxsulluq səviyyəsinin azaldığını, inflyasiyanın birrəqəmli səviyyədə olduğunu diqqətə çatdıran prezident son onillikdə ölkə iqtisadiyyatın üç dəfə artdığını bildirib: “Biz bu gün insan kapitalına sərmayə yatırırıq. Təhsilə qoyulan sərmayə bizə iqtisadiyyatımızı bacarıqlı insan kapitalı hesabına inkişaf etdirməyə imkan yaradır. Eyni zamanda İKT-nin inkişafı diqqət mərkəzindədir. Azərbaycanda kosmos sənayesi yaranıb və Azərbaycan kosmik klubun azsaylı üzvlərindəndir”.

Prezident qeyd edib ki, son 10 ildə ölkəyə 130 milyard dollar sərmayə yatırılıb: “Bunun da müəyyən hissəsi xarici sərmayədir. Bu isə ölkədəki sabitliyi göstərir”.

İ. Əliyev Asiya və Avropanı birləşdirən Bakı-Tiflis-Qars dəmiryolu layihəsinin regionun inkişafı baxımından mühüm əhəmiyyət kəsb etdiyini vurğulayıb.

Prezident TANAP layihəsinin yeni enerji dəhlizi olduğunu, onun ən azı 100 il Avropanın enerji təhlükəsizliyində mühüm rol oynayacağını qeyd edib.//APA

09:40

Bu gün Bakıda «Cənubi Qafqazın və Mərkəzi Asiyanın gələcəyi ilə bağlı Strateji Dialoq» mövzusunda I Dünya İqtisadi Forumu (Davos Forumu) başlayıb.

Forumda Azərbaycan prezidenti İlham Əliyev də iştirak edir.
 
Tədbiri açan Davos Forumunun icraçı direktoru Klaus Şvab tədbirin təşkilində dəstəyinə görə Azərbaycan prezidentinə təşəkkürünü bildirib.
 
Azərbaycanın sürətlə inkişaf edən ölkə olduğunu deyən K. Şvab qeyd edib ki, ölkənin coğrafi mövqeyindən, yüksək təhsil almış işçi potensialından bu regionda birgə istifadə etmək olar. O, həmçinin Azərbaycanın maliyyə, bank, tikinti sektorunun inkişaf getdiyini diqqətə çatdırıb.
 
Forumun keçirilməsində məqsədin uzunmüddətli ssenarilər hazırlamaq və inkişafa təkan vermək, regionun unikal imkanlarını aşkar etmək olduğunu deyən K. Şvab bu məqsədlə dünyanın müxtəlif ölkələrindən nümayəndələrin tədbirə qatıldığını vurğulayıb.
 
Daha sonra regionun imkanlarına həsr olunmuş video rolik nümayiş olunub.

APA