Səudiyyə Ərəbistanı kralı Salman İraqa dünyanın ən böyük stadionunu hədiyyə edəcək. 

Qaynarinfo xəbər verir ki, paytaxt Bağdadda tikilməsi planlaşdırılan stadionun azarkeş tutumu 135 min nəfər olacaq.

Arena planlaşdırıldığı kimi tikilsə və azarkeş sayı dəyişdirilməsə, dünyanın ən böyük stadionu olacaq. 

İngiltərənin "Daily Miror" qəzeti yazır ki, "DÇ-2018"ə vəsiqə qazanan Səudiyyə Ərəbistanı ilə İraq arasında yoldaşlıq oyunundan öncə kral Salman ölkəsinin daha şanslı olduğunu bildirmiş və İraqın baş naziri Heydər əd-Abadiyə uduzacaqları halda bu ölkədə stadion tikdirəcəyini vəd edib.

Qeyd edək ki, fevralın 28-də Səudiyyə Ərəbistanı və İraq milliləri arasında yoldaşlıq oyunu keçirilmiş, iraqlılar 4:1 hesablı qələbə qazanmışdı. Həmin vaxt kral Salman Heydər əd-Abadiyə stadion sözü vermişdi.

Məsələ ilə bağlı açıqlama verən Heydər əd-Abadi "Kral Salman mənə zəng gəldi və İraqı qələbə münasibəti ilə təbrik etdi. İki ölkə arasında bütün sahələrdə əməkdaşlıqdan danışdı. Həmçinin İraq üçün 100 min tamaşaçı tutumuna sahib ola biləcək bir stadionun tikintisi üçün işbirliyi təklif etdi" deyib.

Səudiyyə Ərəbistanı ilə İraq arasında 1990-cı ildə baş verən Körfəz müharibəsindən sonra davam edən soyuqluğun aradan qaldırılması üçün son dövrlər müəyyən addımlar atılır ki, bu da onlardan biri hesab olunur. Bildirilir ki, Səudiyyə Ərəbistanı İraqla siyasi, iqtisadi, mədəni və idman sahələrində əməkdaşlıqda maraqlıdı.