Moskvada uşaq bağçasında 4 yaşlı azərbaycanlı qız şaxtadan donaraq ölüb (VİDEO)

"Report” yerli mətbuata istinadən xəbər verir ki, ilkin məlumata görə, tərbiyəçi gəzintidən sonra uşaqları binaya geri aparan zaman Zəhra Rzayeva adlı qız qrupdan geri qalıb.

Tərbiyəçi onun yoxluğundan bağçada xəbər tutub. Qadın küçəyə qayıdıb və uşağı huşsuz halda yerdə uzanmış vəziyyətdə tapıb.

Müəssisə əməkdaşları bu ittihamı rədd edərək bildirirlər ki, uşaq "bioloji" səbəbdən ölüb.

Faktla bağlı Rusiya Cinayət Məcəlləsinin 109-cu maddəsi üzrə ("Bir şəxsin peşə öhdəliklərini səhlənkar yerinə yetirməsi nəticəsində ehtiyatsızlıqdan ölümə səbəb olma") cinayət işi qaldırılıb.

Uşağın ölümü ilə bağlı iki fərziyyə var.

KİV-in məlumatına görə, tərbiyəçilər sadəcə uşağı küçədə unudublar və o, soyuqdan donaraq ölüb. Bağça əməkdaşları dindirilmə zamanı başqa bir fərziyyə səsləndiriblər. Təqribən günorta saatlarında tərbiyəçi uşaqlara gəzintinin başa çatdığını bildirib. Qrup bağçaya daxil olmağa başladıqda, qadın uşaqlardan birinin olmadığını görüb. Uşaqlar qadına bildiriblər ki, qız bir qədər əvvəl digərləri ilə oynadığı yerdə oyuncaqları evciyə yığmağa gedib.

Tərbiyəçi körpənin dalınca getdikdə, onu açıq verandada tapmayıb. Belə olan halda qadın evciyin arxasına keçib və orada qar topasının altında qızın meyitini tapıb. O, kürəyi üstə uzanmış vəziyyətdə olub və uşaqda həyat əlamətləri olmayıb.

Bağçanın həkimi uşağa ilkin yardım göstərmək istəyib. Lakin sonradan "təcili yardım" çağırılıb. Bu da bir nəticə verməyib. Uşaq artıq dünyasını dəyişmiş olub. Hazırda onun meyiti tibbi ekspertizaya göndərilib və ölümün dəqiq səbəbi meyit yarıldıqdan sonra bilinəcək.

Uşaq sağlam olub

Uşaq Moskvada azərbaycanlı ailəsində doğulub. Ailədə daha iki övlad – həmin bağçaya gedən 6 yaşlı oğlan və məktəbdə oxuyan 9 yaşlı qız var. Valideynlər rəsmi olaraq heç yerdə işləmirlər və ailə meyvə-tərəvəz satışından əldə olunan gəlir hesabına dolanır.

Ailə başçısı istintaqa məlumatında bildirib ki, mərhum övladı həkim müşahidəsində olmayıb və heç bir xəstəlikdən əziyyət çəkməyib. Lakin bir neçə gün əvvəl valideynlər uşağın bədənində qançır izləri aşkar ediblər, qızın özü isə bir neçə gün əvvəl uşaq bağçasına getmək istəmədiyini deyib. Bu səbəbdən də atası onu vaxtından əvvəl bağçadan götürməli olub.

Hadisə yerinə gələn digər uşaqların valideynləri bağçada həddindən artıq çox uşağın olmasından şikayətləniblər. Analardan biri bildirib ki, normativə görə 28 nəfərin əvəzinə qrupa 40-dək müxtəlif yaşlı uşaq qəbul edilib.

Bağçanın baş tərbiyəçisi Yelena Oqanesova hadisə ilə bağlı şərh verməkdən imtina edib.