"Qarabağ" "Qəbələ" oyununda qol vurulmadı (VİDEO)

Bu gün Topaz Premyer Liqasında mövsümün ikinci yarısı start götürüb.

 

Qaynarinfo xəbər verir ki, mövsümün XV turun ilk oyun günündə iki qarşılaşma baş tutub.

2018-ci ilin açılış oyunu Zirədə keçirilib. Qəsəbənin eyniadlı təmsilçisi "Sumqayıt”ı qonaq edib. "Zirə" bu gün bir-biriylə üz-üzə gələcək liderlərdən uzaq düşməmək üçün qələbə qazanmağa, "kimyaçılar” ilk "üçlüy”ə yaxınlaşmağa, ən yaxın izləyicisi "Neftçi”dən uzaqlaşmağa çalışırdı. Oyuna fəal başlayan "Sumqayıt" 35-ci dəqiqədə hesabı açsa da, "Zirə" 4 dəqiqə sonra bərabərliyi təmin edib. Bundan sonra oyunda qol vurulmayıb və matç 1:1 hesabı ilə yekunlaşıb.

III dövrənin mərkəzi qarşılaşması "Azərsun Arena”da "Qarabağ"la "Qəbələ" arasında baş tutub. Çempionatdakı əsas rəqibini yenəcəyi halda, ağdamlılar növbəti çempionluğa doğru ciddi addım atmış sayılacaqdı. Belədə xal fərqi 9-a çatacaqdı ki, rəqabət sarıdan axsayan birincilikdə bunun aradan qaldırılacağı inandırıcı görünməyəcəkdi. "Qırmızı-qaralar” intriqanı qorumaq naminə rəqib meydanında xal və ya xallar qazanmalı idi. 90 dəqiqə ərzində azarkeşlər qol görməyib və oyun 0:0 hesabı ilə başa çatıb.

 

Qollar: Vüsal İsgəndərli, 39 - Tural Axundov, 35.

 

  

№	Klub		O	Q	H/H	M	T/F	X
1	Qarabağ		15	12	2	1	25:6	38
2	Qəbələ		15	10	2	3	28:14	32
3	Zirə		15	9	4	2	24:12	31
4	Sumqayıt		15	6	3	6	18:18	21
5	Neftçi		14	5	1	8	17:16	16
6	Səbail		14	4	1	9	9:21	13
7	Keşlə		14	2	2	10	9:24	8
8	Kəpəz		14	2	1	11	10:29	7
Bombardirlər		Baqali Dabo (Qəbələ) - 9. Mahir Mədətov (Qarabağ), Riçard Qadze (Zirə) - 6. Amil Yunanov (Sumqayıt) - 5.