CEMAL SÜREYYA

ŞƏRAB

Saat on ikidən sonra
Bütün içkilər
Şərabdır.

PARK

Elə sevdim ki, səni
Sən eləsən ki!
Quşlar kimi civildər
Daddırdığın acılar.

QALIĞI QALSIN

Ölürəm tanrım,
Bu da belə oldu.
Hər ölüm vaxtsızdır
Bilirəm, tanrım.
Amma ayrıca aldığın bu həyat
Pis deyildi
Qalığı qalsın, qaytarma...

EDİP CANSEVƏR

Yaşıl ipək köynəyinin yaxalığı
Əski zamanlara çəkər.

Hər şeyin artığı zərərlidir axı
Şeriyyətin artığından öldü Edip Cansevər.

TƏK YASAQ

Azadlığın gəldiyi gün
O gün ölmək yasaq!

ÖLÜM

Birdən ölüm gəlir ağlıma ölüm
Və bir ağacın gövdəsinə sarılıram.

YAXIN

Gözəlsən sevgilim
Amma çox yaxından!

DUEL

Bil ki hər dueldə
Acı həyat var
Ölüm qorxusundan betər.

Dünən güvəndiyin adam
Qarşı tərəfdədir
Və daha çox yandırır bu
ölümdən də,
qorxusundan da...

BU BİZİMKİ

Yıxıcı bir eşqdir bu
İzdihamın içinə tökür
Sevgi yükünü.

Bölücü bir eşqdir bu
Çörəyi suyu bölür 
Gündə üç öynə.

Xain bir eşqdir bu
Sizin evə oğru girər
Onunkinə polis.

Qanunsuz eşqdir bu
Evlənmək
Ağlının ucundan da keçməz.

Soyğunçu eşqdir bu
Ən adi melodiyadan
Sevinclər bəxş edər.

Kökü çöldə bir eşq
Dante ilə Beatriçanınkinə 
Çox yansıyar.

İşğalçı bir eşqdir bu
Samanlıq sevişənindir deyir
Başqa şey demir... 

SAY

Ay işığında oturanda
Biləyindən öpdüm sənin

Sonra ayaq üstə öpdüm
Dodağından öpdüm sənin

Qapı arasında öpdüm
Nəfəsindən öpdüm sənin

Bağçada körpələr vardı
Körpəliyindən öpdüm sənin

Evimdə yatağıma aldım səni
Qasığından öpdüm sənin

Başqa evlərdə qarşılaşdıq
İliyindən öpdüm sənin

Ən sonda küçələrdə
Qaynağından öpdüm sənin.

Çevirdi:
Azad Qaradərəli