Dünya 15:34 15.11.2017

Təbii fəlakətlər 1 ildə dünyaya 188 milyard dollar zərər vurub

Bu ilin oktyabr ayına qədər baş verən təbii fəlakətlərin dünyaya vurduğu zərərin ümumi miqdarı 188 milyard 870 milyon dollara çatıb.

"Qaynarinfo" xarici mediaya istinadən xəbər verir ki, təkcə bu il ərzində baş verən zəlzələlərin vurduğu zərərin miqdarı 11 milyard 730 milyon dollardır. 2017-ci ildə təbii fəlakətlərin ümumi sığorta təminatı 53 milyard 890 milyona, zəlzələnin sığorta təminatının miqdarı isə 2 milyard 780 milyona çatıb.

2016-cı ildə təbii fəlakətlərin vurduğu zərər 210 milyard dollar olmuşdu. Bu ilin sonuna qədər bu rəqəmin daha böyük olacağı gözlənilir. Ən çox zərər verən təbii fəlakətlər zəlzələ, su basqını və quraqlıq hesab edilir.

Son 3 ayda dünyada 5 böyük zəlzələ baş verib. Sentyabrda Meksika və Quatemala güclü zəlzələ ilə sarsıldı. Bölgədə baş verən təbii fəlakət 98 nəfərin ölümünə, 50 mindən çox tikilinin zərər görməsinə, 1 milyard 250 milyon dollar maddi itkiyə səbəb olub. 19 sentyabr Meksika zəlzələsində 370 nəfər ölüb. 10 oktyabrda Çilidə baş verən zəlzələnin gücü isə 6,3 bal idi.

12 noyabrda İraq-İraq sərhəddində baş verən 7,3 bal gücündə zəlzələ isə ilin ən dəhşətli fəlakətlərindən hesab olunur. İranda 6700 nəfər yaralandı, 407 nəfər dünyasını dəyişdi, 70 min nəfər evlərini tərk etmək məcburiyyətində qaldı. İraqda isə 255 nəfər yaralandı, 7 nəfər dünyasını dəyişdi. Zəlzələ Azərbaycan da daxil olmaqla 7 ölkədə hiss edildi.

Eyni gündə Kostarika 6,4 bal gücündə olan zəlzələ ilə sarsıldı.

Gülşən

Qaynarinfo.Az