Amerikalı aktyor Maykl Duqlas hazırda 63 yaşı olan aktrisa Cin Tripplhornla gizli münasibətindən danışıb. Münasibət 1992-ci ildə “Əsas instinkt” kult trillerinin çəkilişləri zamanı başlayıb. 82 yaşlı “Oskar” mükafatı laureatı bu münasibətin təfərrüatlarını bu yaxınlarda nəşr olunan “One Helluva Ride” adlı memuarlarında açıqlayıb.
Qaynarinfo xəbər verir ki, bu barədə “FilmNow.ro” yazıb.
Duqlasın sözlərinə görə, ictimaiyyət onun filmdə baş qadın rolunu canlandıran Şeron Stounla romantik münasibətdə olduğuna əmin idi. Lakin aktyorun çəkiliş meydançasındakı başqa bir həmkarı ilə münasibətləri inkişaf edirdi.
“Hamı mənə və Şerona o qədər diqqət yetirmişdi ki, Cinlə aramızdakı əsl münasibəti gözdən qaçırmışdı”, deyə Duqlas yazıb.
Aktyor etiraf edib ki, münasibətlərini çəkiliş qrupunun digər üzvlərindən diqqətlə gizlətməli olublar.
San-Fransiskoda filmin çəkilişləri zamanı aktyorlar birlikdə çox vaxt keçirir, söhbət edir və tədricən bir-birlərinə yaxınlaşırdılar.
“Biz söhbət edir, bir-birimizi həqiqətən tanıyır və çəkiliş meydançasından, eləcə də bütün başqa şeylərdən uzaqda bir-birimizin yoldaşlığından zövq alırdıq”, deyə Maykl xatırlayıb.
Filmdə Duqlas qətli araşdıran detektiv Nik Karran rolunu, Tripplhorn isə polislə əməkdaşlıq edən psixoloq Bet Qarner obrazını canlandırıb. Süjetə əsasən, onun qəhrəmanı aktyorun personajı ilə münasibətdə olub.
“Cin xüsusi qadın idi”, deyə Duqlas bildirib.
Aktyor qeyd edib ki, tamaşaçılar uzun illər ərzində onun Şeron Stounla ekrandakı münasibətini müzakirə etsələr də, Tripplhornla yaşadığı eşq macərası kölgədə qalıb.
Duqlas həmçinin çəkilişlər başa çatdıqdan sonra Cindən tədricən uzaqlaşdıqlarını və ünsiyyətlərinin azaldığını bildirib. Aktyor onların münasibətinin tarixçəsini memuarlarına daxil etmək qərarına gəldikdə keçmiş sevgilisi ilə əlaqə saxlayaraq bu barədə açıq danışmaq üçün icazə istəyib. Tripplhorn buna razılıq verib.
Kitabda aktyor Tripplhornun hələ evli olan kişi ilə münasibətə başlamaq istəmədiyini də açıqlayıb. Həmin vaxt Duqlas Diandra Lükkerlə evli olsa da, cütlük artıq ayrı yaşayır və başqa insanlarla görüşürdü. Aktyor Cinə nikahının faktiki olaraq başa çatdığını deyib.
“Mən ona dəlicəsinə vurulmuşdum”, deyə aktyor etiraf edib. O əlavə edib ki, Cin Tripplhornu həmişə görkəmli aktrisa və həyatının bir hissəsini onunla keçirmək fürsəti qazandığı gözəl qadın kimi xatırlayacaq.
Hazırda Cin Tripplhorn aktyor Liland Orserlə evlidir. Onlar 2000-ci ildə ailə qurublar və bir oğul övladları var. Maykl Duqlas isə 2000-ci ildən aktrisa Ketrin Zeta-Consla evlidir. Cütlüyün iki övladı var.
Aydın
Şərhlər