Aprel döyüşlərinin iştirakçısı: “Ermənistan ordusunun döyüş əzmini qırdıq”

Azərbaycan Ordusunun parlaq tarixi qələbəsi olan Aprel döyüşlərindən dörd il ötür. 2016-cı ilin aprel ayının ilk günlərində düşmən təxribatının qarşısını alan Azərbaycan Ordusu əks hücuma keçərək Ermənistan hərbi birləşmələrinə cavab zərbəsi vurub. Bir neçə gün davam edən döyüşlərdə işğalda olan strateji yüksəkliklər, Cəbrayıl, Füzuli, Ağdərə rayonlarının bəzi hissəsi, ümumilikdə isə 2 min hektar ərazi təkrar Silahlı Qüvvələrimizin nəzarətinə keçib.

Lələtəpə strateji yüksəkliyinin düşməndən geri alınması nəticəsində Cəbrayıl rayonunun Cocuq Mərcanlı kəndinin təhlükəsizliyi də tam təmin olunub.

Aprel döyüşlərinin iştirakçısı, "N" saylı hərbi hissənin keçmiş artilleriya rəisi, ehtiyatda olan polkovnik-leytenant Eldəniz Hüseynov "MediaPost”a açıqlamasında deyib ki, dördgünlük döyüş Ermənistan ordusunda olan özünəinamı, döyüş əzmini qırdı, "məğlubedilməz” dedikləri erməni əsgəri məğlub oldu: "Aprel döyüşləri çoxdandır aktiv döyüş əməliyyatları aparmayan ordu üçün yaxşı təcrübə oldu. Əlbəttə ki, səhvlərimiz də oldu, normal haldır. Şəhid verdik, xüsusi təyinatlılar qeyri-bərabər döyüşdə şəhid oldular. Ancaq Aprel hadisələri tarixi qələbəmizdir. Bu, ordumuz, millətimiz adına şanslı hadisədir”.

Ehtiyatda olan polkovnik-leytenant bildirib ki, Aprel döyüşləri nəticəsində Azərbaycan Ordusu işğal olunmuş ərazilərin bir hissəsini azad edərək həmin yerlərə nəzarəti yenidən təmin edib.

"Hadisələr göstərir ki, biz ərazi bütövlüyümüzü müharibə yolu ilə də olsa bərpa edəcəyik. Təkcə Dördgünlük döyüşlərdə işğaldan azad etdiyimiz ərazilərə deyil, işğal olunmuş bütün ərazilərimizə nəzarət edəcəyik”, - Aprel döyüşlərinin iştirakçısı vurğulayıb.

Qeyd edək ki, Ermənistan silahlı qüvvələrinin bölmələri və Dağlıq Qarabağdakı separatçı rejimin qanunsuz silahlı dəstələri 2016-cı ilin mart ayının ortalarından cəbhə xəttində atəşkəsi intensiv şəkildə pozmağa başlayırlar. aprelin 1-dən 2-nə keçən gecədən başlayaraq bütün cəbhə boyu Azərbaycan Ordusunun mövqeləri və yaşayış məntəqələri düşmən tərəfindən intensiv atəşə məruz qalır.

Təxribatlar zamanı dinc əhaliyə hücumlar olur. Silahlı Qüvvələrimizin həyata keçirdiyi əks-həmlə əməliyyatının məqsədi Ermənistan silahlı qüvvələrinin təmas xəttindəki yaşayış məntəqələrinə törətdiyi təhlükəni aradan qaldırmaq idi.

Belə ki, 2016-cı il aprelin 2-də Ermənistan silahlı qüvvələrinin təxribatlarına cavab olaraq, Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğradaraq, Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad edib. Həmçinin minlərlə hektar ərazi Azərbaycan Ordusunun tam nəzarətinə keçib.

Goranboy rayonu və Naftalan şəhərinə təhlükə yarada biləcək Talış kəndi ətrafındakı yüksəkliklər, eləcə də Seysulan məntəqəsi düşmən qüvvələrindən tam təmizlənib. Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən strateji əhəmiyyətli "Lələtəpə" adlandırılan yüksəklik də Azərbaycan Ordusunun nəzarətinə keçib.

Ordumuzun zərbələri nəticəsində düşmənin 30-dək tankı, 25-dən çox artilleriya qurğusu və digər zirehli texnikası məhv edilib, 320 hərbçisi öldürülüb, 500-dən artıq döyüşçüsü yaralanıb. Ağdərə-Madagiz istiqamətində yolların nəzarətdə saxlanılması təmin edilib.

Bu hadisələr nəticəsində Azərbaycan Ordusu şəhid verib, həmçinin mülki əhali arasında da ölən və yaralananlar olub.

Azərbaycan Respublikasının ərazi bütövlüyünün qorunub saxlanması, erməni işğalçılarının 2016-cı il aprelin 2-dən 5-dək qoşunların təmas xəttində törətdikləri silahlı təxribatların qarşısının alınması və düşmənin dinc əhaliyə hücumlarının dəf edilməsi zamanı göstərdikləri qəhrəmanlıq və igidliyə görə Azərbaycan hərbçilərinin xüsusi fərqlənən bir qrupu 2016-cı il aprelin 19-da Azərbaycan Respublikası Prezidentinin müvafiq sərəncamları ilə yüksək fəxri ada layiq görülüb, orden və medallarla təltif edilib.

Vətən qarşısındakı xidmətlərinə görə təltif edilənlər arasında "Azərbaycanın Milli Qəhrəmanı” fəxri adına, "Azərbaycan Bayrağı” və "Vətənə xidmətə görə” ordenlərinə, "Vətən uğrunda”, "İgidliyə görə” və "Hərbi xidmətlərə görə” medallarına layiq görülənlər vardır.

Uğurlu Aprel qələbəsindən daha da ruhlanan Azərbaycan Ordusu iki il sonra növbəti zəfər qazandı. 2018-ci ilin mayında 1990-cı illərin əvvəllərində ermənilər tərəfindən zəbt edilmiş 11 min hektar torpaq Naxçıvan Əlahiddə Ümumqoşun Ordusu tərəfindən aparılmış uğurlu əməliyyat nəticəsində azad edilib.

Aprel döyüşləri Azərbaycan xalqının və Ordusunun tarixi ərazilərimiz olan Dağlıq Qarabağ və ətraf rayonların işğaldan azad edilməsi üçün hər cür fədakarlığa və hərbi qüdrətə hazır olduğunu düşmənlə yanaşı, bütün dünyaya sübut etdi.

Ötən müddət ərzində işğaldan azad olunan ərazilərdə, o cümlədən aprel qələbəsi ilə düşmən təhlükəsinin uzaqlaşdırıldığı Cəbrayıl rayonunun Cocuq Mərcanlı kəndində təmir bərpa işləri aparılıb, orada yeni qəsəbə salınıb, ata-baba yurdlarından didərgin salınan insanlar geri dönüblər. Kənddə məscid tikilib, Cocuq Mərcanlı kənd məscidi dini icması fəaliyyət göstərir.