“Bakcell” müharibə veteranlarına həsr olunmuş sərgiyə dəstək göstərib (R)

Azərbaycanın ilk mobil operatoru və ən sürətli mobil internet provayderi "Bakcell” şirkəti Böyük Vətən müharibəsi veteranlarından bəhs edən sərgiyə dəstək göstərib. 

Qaynarinfo xəbər verir ki, 9 May – Qələbə Gününə həsr olunmuş "Qələbə ruhunu yaşadanlarımız” adlı sərgi "Bakı Metropoliteni” QSC tərəfindən "Bakcell”in dəstəyilə "Gənclik” metrostansiyasının keçidlərində təşkil edilib. Fotosərgidə Böyük Vətən müharibəsində qəhrəmancasına vuruşmuş canlı əfsanələr - azərbaycanlı veteranların fotolarından ibarət tablolar nümayiş olunur. Bununla yanaşı, Böyük Vətən müharibəsində Azərbaycanın rolu barədə maraqlı, diqqətçəkən məlumatların verildiyi stendlər də sərgilənir.

Müharibə iştirakçıları haqqında daha ətraflı məlumat almaq üçün sərgidəki şəklin altında yerləşdirilən QR koddan istifadə etmək lazımdır.

Sərginin açılışı mayın 7-də "Bakı Metropoliteni” QSC-nin və "Bakcell”in rəsmi nümayəndələri, həmçinin Böyük Vətən müharibəsi cəbhələrində döyüşmüş veteranların iştirakı ilə keçirilib.