– Həmişə həmkarlarım "gündəm” deyəndə zarafatca deyirdim ki, mən il boyu gündəmdəyəm (gülür). Bildiyiniz kimi ailəmdə bir-birinin ardınca faciələr baş verdi. Ona görə də bir müddət efirlərdən uzaqlaşdım, sakitcə öz həyatımı yaşadım. Oxuduğum mahnılar da 2 il əvvəl yazdırdıqlarım idi. Yavaş-yavaş yaxınlarımın psixoloji dəstəyi ilə mən yenidən sənətə qayıtdım. Mən sənətdən yox, ümumiyyətlə elə bil ki həyatdan getmişdim. Bu gün də durumum tam yaxşı deyil, yəqin ki, bundan sonra da əvvəlki kimi olmayacaq. Amma sənətim tələb edir ki, yalandan da olsa gülüm. Ölüm qaşla-göz arasındadır, bunu istəsək də, istəməsək də qəbul etməliyik.

– Siz vaxtilə sözün əsl mənasında məşhurluğun pik həddini yaşayan müğənnilərdən olmusunuz. İndiki müğənnilərlə necə ayaqlaşırsınız?

– Bizim vaxtımızda bu qədər çox müğənni yox idi. Bu mənada bizim üçün hər şey çox rahat idi. Bizim dövrdə efirə də bu qədər çox çıxmaq olmurdu. Bir televiziya kanalımız var idi, ora da hər müğənnini buraxmırdılar. İndi efirlər çoxdur, hər telekanalda kommersiya bölümü var. Yaxşı da olsa, pis də olsa müğənniləri efirə çıxarırlar. Bir klip və bir mahnı ilə tanınıb sevilmək də mümkün deyil. Müğənni olmaq istəyirsənsə, bu sahəyə qatılmaq istəyirsənsə, əvvəla qabında istedadın olmalıdır. Savadın da varsa, daha gözəl olar. Bu cür efirə çıxmaq lazımdır ki, sən sıradan biri olmayasan, yadda qalasan. İndiki müğənnilərin əksəriyyəti qalmaqalla gündəmə gəlir. Qalmaqalla gündəmə gəlmək 5-10 günlükdür. Bəs sonra nə edəcəksən? Adicə "Tarqovu”da min nəfər ora-bura gedir, heç kim bir-birinə baxmır, amma bir dənə əndrabadi geyimdə insan çıxan kimi hamının fikri onda qalacaq. Qalmaqal edən müğənnilər də belədir. Müğənninin işi oxumaqdır, axtar tap gözəl mahnılar seç, mahnınla sözünü de. Yerdə qalan şeylər hamısı gəldi gedərdi. Bunlar adamı tez gözdən salar.

– Əndrabadi dediniz yadıma Elza Seyidcahan düşdü. Bilirəm ki, Elza xanımla münasibətləriniz yaxşıdır, amma sizcə o bir qədər çox abartmır?

– Elza ilk əvvəllər efirlərə bu cür çıxanda ola bilər ki, insanlarda şok yaradırdı. İndi amma Elza qəbul olunub. Elzanın axı sənəti, gözəl bəstələri var.

– Nüşabə xanım istərdim bir az xarakterinizdən mənə danışasınız. Pisliyə pisliklə cavab verirsiniz, yoxsa?

– Əgər mənə pislik olunubsa, mən o pislikdə gözəllik axtarmıram. Adından da göründüyü kimi pislikdir də. Mən sadəcə susuram, hər şeyi zamana buraxıram. Zaman gəlib çatır, həmin insanın özü məndən üzr istəyir. Ona görə də bu gün mən hesab edirəm ki, bu aləmdə elə bir problem yaşadığım həmkarım olmayıb. İnsanları bəzən bağışlamağı bacarmaq lazımdır.

– Sizi həm də bir aktrisa kimi filmlərdə görmüşük. Niyə bu sahəni genişləndirib, davam etdirmədiniz?

– Mən dirijoram, musiqişünasam. Bu gün də İncəsənət universitetində estrada fakültəsində dərs deyirəm. Zamanında dostlarım və böyük sənətkarlar məni dəvət edirdilər, gedib çəkilirdim. Amma bu gün mənim buna vaxtım yoxdur. Çünki mən həm pedoqoji fəaliyyətlə məşğulam, həm də toylara gedirəm. Heç vaxtım da olmur ki, gedim səhərdən axşama kimi hansısa serialın setində oturum.

– Toylardan söz düşmüşkən o vaxt məşhur türk müğənnisi İbrahim Tatlısəsi oğlunuzun toyuna gətirməyiniz böyük sensasiya oldu. İbrahim bəy qonorar qarşılığında toya gəlmişdi, yoxsa sırf sizi tanıdığı üçün?

– Xərclər təbii ki, olmuşdu. Musiqiçilərin və onların gəliş-gediş biletini almışdım. Amma özü üçün qonorar istəməmişdi. Bizi ortaq dostlarımız tanış etmişdi.

– Hazırda münasibətləriniz varmı?

– Xeyr, hal-hazırda əlaqələrimiz yoxdur. Hər birimizin öz ailə qayğıları var. İstanbula getsəm, onunla görüşmək istəyərəm.

– Xoşbəxt anasınız, yoxsa xoşbəxt qadın?

– Mən həmişə xoşbəxt ana, xoşbəxt qadın, xoşbəxt bacı, xoşbəxt övlad, həm də xoşbəxt həyat yoldaşı olmuşam. İndi xoşbəxt övlad deyiləm, çünki valideynlərim rəhmətə gedib. Sadəcə xoşbəxt ana və həyat yoldaşıyam.

– Övladlarınızı evləndirməyi düşünürsünüz?

– Hal-hazırda onlar evlənmək haqqında yox, karyera qurmaq haqqında düşünürlər. Zaman gələr hər şey olar. Bizim ailədə övlada o barədə basqı yoxdur. Kimi istəyərlər, onunla da ailə həyatı qurarlar.

– Bir zamanlar həm də bizneslə məşğul idiniz. İndi bəs necə?

– Bəli, o vaxtı məşğul oldum, marketlərim də, salonlarım da var idi. Hal-hazırda onların heç biri fəaliyyət göstərmir. Fəaliyyət göstərmək üçün gərək mən bütün vaxtımı və zamanımı ona həsr edərdim. Ona görə də uğursuzluğa düçar oldum.