"Avro-2016"nın püşkü atılır

Bu gün 2016-cı ildə Fransada təşkil olunacaq futbol üzrə Avropa çempionatının seçmə mərhələsinin püşkü atılacaq.

Qol.Az-ın məlumatına görə, Nitsa şəhərində baş tutacaq püşkatma mərasimi Bakı vaxtı ilə saat 15:00-da başlayacaq.

Püşkatmada iştirak edəcək 53 komanda UEFA-nın reytinq siyahısına uyğun olaraq 6 səbətə bölünüb. Azərbaycan milli komandası V səbətdə yer alıb. 

Püşk zamanı isə komandalar hərəsində 6 yığma olmaqla 8 qrupa bölünəcək. Lakin sonuncu - 9-cu qrupda 5 komanda final mərhələsinə vəsiqə qazanmaq uğrunda yarışacaq.

Avropa çempionatları tarixində ilk dəfə olaraq "Avro-2016"nın final mərhələsində 16 deyil, 24 komanda iştirak edəcək. Bu isə o deməkdir ki, seçmə mərhələni ilk iki pillədə başa vuracaq yığmalar birbaşa final mərhələsinə vəsiqə qazanacaqlar. Seçmə mərhələni üçüncü bitirəcək milli komandalar isə pley-off oyunlarından sonra bu hüquqa yiyələnə biləcəklər.

Qeyd edək ki, bəzi ölkələr arasında mövcud olan diplomatik gərginlik səbəbindən Azərbaycanla Ermənistan, İspaniya ilə Cəbəllütariq və Rusiya ilə Gürcüstan yığmaları eyni qrupda yer ala bilməyəcək.

1. İspaniya, Almaniya, Hollandiya, İtaliya, İngiltərə, Portuqaliya, Yunanıstan, Rusiya, Bosniya və Herseqovina

2. Ukrayna, Xorvatiya, İsveç, Danimarka, İsveçrə, Belçika, Çexiya, Macarıstan, İrlandiya

3. Serbiya, Türkiyə, Sloveniya, İsrail, Norveç, Slovakiya, Rumıniya, Avstriya, Polşa

4. Çernoqoriya, Ermənistan, Şotlandiya, Finlandiya, Latviya, Uels, Bolqarıstan, Estoniya, Belarus

5. İslandiya, Şimali İrlandiya, Albaniya, Litva, Moldova, Makedoniya, Azərbaycan, Gürcüstan, Kipr

6. Lüksemburq, Qazaxıstan, Lixtenşteyn, Farer adaları, Malta, Andorra, San-Marino, Cəbəllütariq

Qaynar.info