QARDAŞXAN
QANUNUN GERİYƏ QÜVVƏSİ YOXDUR
Rafiq Tağıya və bütün şəhidlərə
Zaman başım üstdən keçir, ayağım altdan yer qaçır..,
Neylə,–yerə gir, göyə çıx,–neylirsən eylə,–gor açıq...
Tərs-məzhəb çərxi-fələk Yer hey fırlanıb yer açır,–
Zamanın geriyə qüvvəsi yoxdur!
"Dünya mənim” deyən insan, rütbələrin girovusan..,
Qan, bu şəhid qanlarının bahasıdır aldığın ad...
İrin-qan olub burnundan töküləcək çapqın həyat,–
Dünyanın geriyə qüvvəsi yoxdur!
Dünyanı dördəlli tutan, ikiəlli torpağı tut,
Dərd-sərin sər dərdi–torpaq, dərmanı hər dərdin–torpaq,
Arzular arzusu torpaq arzumuz çat-çatdır.., çat, çat!..
Arzunun geriyə qüvvəsi yoxdur!
Evləri göydələnlərim, bir son mənzil də var ancaq..,
Dünya səndən soyuyanda, sən dünyanı soyunanda
Yenə bizə qucaq açan sonunda torpaq olacaq...
Torpağın geriyə qüvvəsi yoxdur!..
Şərhlər