Rəqabət Məcəlləsi qəbul oluna bilər: Beynəlxalq təşkilatlarla razılaşmalar aparılır

Rəqabət Məcəlləsi qəbul oluna bilər: Beynəlxalq təşkilatlarla razılaşmalar aparılır

Rəqabət Məcəlləsinin qəbul edilməsi "Strateji yol xəritəsi”ndə 2019-2020-ci illərdə üçün nəzərdə tutulub.

Qaynarinfo xəbər verir ki, Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov bu barədə Modern.az-a hazırda sənəddə bəzi dəyişikliklər edildiyini bildirib:

"Mənim aldığım məlumata görə, hazırda bunun üzərində iş gedir. Milli Məclis tərəfindən keçən iki oxunuşa bəzi dəyişikliklər edilir. Həmçinin, beynəlxalq maliyyə qurumları ilə razılaşmalar aparılır”.

Deputat qeyd edib ki, Rəqabət Məcəlləsi mütləq qəbul edilməlidir:

"Çünki bu, "Strateji yol xəritəsi”ndə Prezident İlham Əliyev tərəfindən təsdiq edilib. Amma hələlik Milli Məclisə daxil olmayıb. İslahatların ciddi və kompleks şəkildə aparıldığı indiki halda Məcəllənin qəbul olunması mütləqdir. Bu, hazırda bazarda vəziyyəti normallaşdırmaq üçün çox vacibdir. Biz çalışacağıq ki, 2019-cu ildə Rəqabət Məcəlləsi qəbul olunsun. Fikir verirsinizsə, son vaxtlar bazarda ciddi problemlər, bəzi məhsulların qiymətləri ilə bağlı narazılıqlar yaranıb. Rəqabət Məcəlləsi qəbul olunacağı təqdirdə, bu kimi problemlərin həlli mümkün olacaq”.
V.Əhmədov "bəziləri bu Məcəllənin qəbul edilməsinə mane olur” fikrinə də  toxunub:

"Bəzilər dedikdə, əsas monopolistlər nəzərdə tutulur. Əgər Rəqabət Məcəlləsi "Strateji yol xəritəsi”nə dövlət başçısı tərəfindən salınıbsa, artıq buna heç kim mane ola bilməz və qəbul olunacaq”.

Qeyd edək ki, Rəqabət Məcəlləsi 2006-cı ildə Prezident tərəfindən Milli Məclisə təqdim edilib. Bu qanun layihəsi iki oxunuşdan keçsə də, üçüncü oxunuşa çıxarılmayıb.
XƏBƏRLƏR
BLOGLAR