Rəsulzadə ilə bağlı prezidentə müraciət edildi

Məhəmməd Əmin Rəsulzadə Mərkəzinin sədri, tarixçi-alim Nəsiman Yaqublu prezident İlham Əliyevə müraciət ünvanlayıb. O, öz müraciətində Rəsulzadənin 130 illik yubileyinin keçirilməsi ilə bağlı ölkə başçısının verdiyi sərəncamın ictimaiyyət tərəfindən rəğbətlə qarşılandığı və cəmiyyətdə barışa yönəlik mühüm hadisə kimi qiymətləndirilir.

Müraciətdə deyilir: “22 ilə yaxındır müstəqilliyini elan etmiş Azərbaycanda bu dövlətin yaradıcısına olan sayğısız münasibətlərə,  nəhayət, son qoyulacağı ümidindəyik. Düşünürəm ki, Rəsulzadənin bir daha nə heykəli uçurulacaq, nə büstü dağıdılacaq, nə də ona  ögey yanaşmalar sərgilənəcək”.

Tarixçi-alim daha sonra Rəsulzadə və onun silahdaşlarının zəngin irsini toplamaqda və nəşr edilməkdə tədqiqatçıların dövlətdən  lazımi dəstək görmədiyini qeyd edir və təkliflərini verir: “Azərbaycanda 15 ilə yaxındır fəaliyyət göstərən, Rəsulzadə ilə bağlı  kitablar hazırlayan, Azərbaycan və rus dillərində ensiklopediyalar çap edən, müxtəlif konfrans və tədbirlərin təşkilatçısı olan,  təəssüflər ki, Ədliyyə Nazirliyində hələ də dövlət qeydiyyatına alınmayan Məhəmməd Əmin Rəsulzadə Mərkəzinin rəsmi fəaliyyət göstərməsinə şərait yaradılsın, ofislə təmin edilsin; fəaliyyəti üçün dövlətdən vəsait ayrılsın - Atatürk və Heydər Əliyev Mərkəzi, digər qurumlar kimi. M.Ə.Rəsulzadənin, eləcə də onun silahdaşları olan Ə.Topçubaçovun, C.Hacıbəylinin, Ə.F.Düdənginskinin,  M.Musazadənin.M.B.Məmmədzadənin və başqalarının Almaniyada, Türkiyədə, Polşada, İngiltərə və ABŞ arxivlərində olan zəngin irsi və  sənədlərinin toplanılıb Azərbaycana gətirilməsi üçün bizim mərkəzə və biz tədqiqatçılara imkan yaradılsın. M.Ə.Rəsulzadənin və onun  silahdaşlarının əsərlərinin nəşr edilməsi üçün Məhəmməd Əmin Rəsulzadə Mərkəzinə fəaliyyət şəraiti yaradılsın. Rəsulzadənin Bakı  şəhərində ev muzeyi yaradılsın, ona Bakıda əbədi heykəl ucaldılsın”.

Qaynar.info