Yoluxma sayı psixoloji həddi keçdi: Sərt qapanmalar olacaqmı? - Deputat

Qaynarinfo xəbər verir ki, bunu Milli Məclisin deputatı Vüqar Bayramov omikron vurusunun sürətlə yayılması ilə bağlı iqtisadi sektorda qapanmalar ola bilərmi sualına cavabında deyib. Deputat Azərbaycanda COVİD-19 (Omikron) virusuna yoluxma sayının 6 minlik psixoloji həddi keçdiyini vurğulayıb:

"Əslində, "Omikron" virusunun yoluxma tezliyini nəzərə alsaq, bu gözlənilən idi. Yenidən iqtisadi sektorda qapanmalar ola bilərmi? "Lock-down” tədbirlərinə ehtiyac varmı?

Son günlər qonşu ölkələrdə də yoluxma sayında ciddi artımlar müşahidə olunur. Dünən Rusiyada 141 min 883, Türkiyədə 110 min 682, Gürcüstanda 26 min 320 nəfər virusa yoluxub. ABŞ və Fransada isə gündəlik yoluxma sayı 300 mindən çoxdur. Bütövlükdə, dünən dünyada 3 milyondan çox insanda virus aşkar olunub. Göründüyü kimi, əksər ölkələrdə yoluxma sayları rekord səviyyədədir. Buna rəğmən, artıq bir sıra ölkələr karantin rejiminin ləğv edilməsi və ya tamamən yumşaldılması kimi qərarlar qəbul edirlər. Bu isə ondan xəbər verir ki, dünya sərt karantinlərdən, yumşaq desək, bezib. Buna görə də, ölkələr "lock down” qərarlarının qəbulunda ehtiyatlıdırlar”.

 

Vüqar Bayramov bildirib ki, Azərbaycan yumşaq karantin rejimini tətbiq edən ölkələrdəndir:

"Omikron" virusunun yayılma dairəsinin geniş olmasına baxmayaraq, indiki halda yenidən sərt qapanmalara getmək arzuolunan deyil. Real sektordakı açılımların və yenidən bərpa olunan aktivliyin qorunub saxlanması vacibdir. Xidmət, ictimai iaşə və turizm kimi sektorlarda aktivlik artıq bərpa olunur və 2022-ci ildə daha geniş dövriyyə hədəflənir. Bu baxımdan, sərt karantın tədbirlərinin tətbiqi deyil, hər birimizin virusdan qorunmaqla bağlı qaydalara tam əməl etməyimiz daha azruolunandır”.