Kamran Ağayev millidən imtina etdi

İyunun 30-dan iyulun 16-dək Azərbaycanda keçiriləcək hərbçilərin dünya çempionatında iştirak edəcək milli komandamız “Neftçi”nin köhnə bazasında hazırlığını davam etdirir. 

"Azerisport"un verdiyi məlumata görə, baş məşqçi Nazim Süleymanov hazırlığın ilk günlərində futbolçuların fiziki hazırlığının yaxşılaşdırılmasına çalışır.

Fiziki məşqlərin tərkib hissəsi kimi dəniz kənarında kross qaçışları da təşkil olunur. Lakin Süleymanov heç də bütün futbolçuları bir araya gətirə bilmir. Kənarda qalanlardan biri də əsas yığmanın qapıçısı Kamran Ağayevdir. Ağayev dəvətlə düşərgəyə təşrif buyursa da, əsas yığmadan yeni qayıtdığını, həmçinin, dizində problem olduğunu əsas gətirərək, məşqlərə qatılmayıb. Başqa sözlə, Süleymanovdan icazə alaraq, aradan çıxıb.

Əldə etdiyimiz digər məlumata görə isə, Kamran Ağayevin heç bir zədəsi yoxdur. O, sadəcə “Bakı”nın yeni mövsüm öncəsi toplanışı ərəfəsində istirahət etmək üçün yığmadan imtina edib.

Qaynar.info