Ekonomiks 17:26 06.03.2018

"Mercedes"in Azərbaycan təmsilçiliyindən təkzib: Belə yazı sifariş verməmişik! (YENİLƏNİB)

Xəbər verdiyimiz kimi, "Autograph.az" saytında dərc olunan "Ərəb şeyxi Gelandewagendə Azərbaycanlı modeli 1 million dollara zorladı" adlı məqalə sosial mediada böyük etirazla qarşılanıb.

Qaynarinfo-nun verdiyi xəbərə görə, "Mercedes"-AMG G 63 modelinin piar reklamını xatırladan məqalənin qeyri-ciddi və yalan üzərində qurulması ictimailəşəndən sonra adıçəkilən sayt o yazını silib.

Bundan əlavə, "Mercedes-Benz"in Azərbaycandakı təmsilçiliyindən İctimaiyyətlə Əlaqələr şöbəsinin rəhbəri Sevinc Abbasova Qaynarinfo ilə əlaqə saxlayaraq, qalmaqallı məqalənin onlara heç bir aidiyyatı olmadığını və belə bir piar məqalə yerləşdirmədiyini bildirdi.

""Mercedes-Benz" kimi qlobal və tanınmış bir brendin belə ucuz reklamlara ehtiyacı yoxdur. Biz nə belə bir yazı sifariş vermişik, nə də bundan xəbərimiz var. Bu yazını həmin sayt öz istəyi ilə eksperiment xatirinə dərc edib. O saytın rəhbəri Ramin Musayev artıq bu barədə öz şəxsi Facebook səhifəsində də açıqlama yazıb. Heç kimin ixtiyarı yoxdur ki, bizim markanın adından bu kimi mövzularda istifadə etsin. Biz bununla bağlı əlavə tədbirlər görəcəyik".

Qeyd edək ki, "Mercedes-Benz"in Azərbaycandakı rəsmi təmsilçisi "АvtoKapital Azərbaycan" şirkətidir.

12:06

Ötən gündən etibarən sosial mediada bir xəbər geniş müzakirələrə səbəb olub. Həmin xəbərdə bildirilir ki, guya ərəb şeyxi yeni aldığı "Mercedes-AMG G 63" markalı avtomobilində azərbaycanlı modeli zorlayıb.

Maraqlıdır ki, nə qadını zorlayan ərəb şeyxinin, nə də zorlanan azərbaycanlı modelin adı açıqlanıb. İddia olunur ki, qadın şeyxi polisə şikayət edəcəyi ilə hədələyib və 1 milyon dollar alaraq susub. Zorlama "Mercedes-Benz G-Class" ofroderinin xüsusi variantların "Night Package" dəsti ilə təchiz edilmiş modifikasiyasında baş verib.

Xəbəri yayan sayt "Arabian Galmagal News" adlı qeyri-müəyyən bir mənbəyə istinad edib. Bu mənbəni tapmaq üçün "Google"da uzun-uzadı axtarışlar apardıq. Lakin belə bir mənbəyə rast gəlmədik.

Sirr deyil ki, bu "məqalə" PR məqsədi ilə yazılıb və "Mercedes-AMG G 63" markasının "reklam"ına hesablanıb. Amma reklam sözündən anlayışı olmayan "marketoloq"lar əslində böyük bir biabırçılığa imza atıblar. Həm də guya bir qadının, özü də azərbaycanlı xanımın zorlanması qarşılığında 1 milyon dollar alaraq susmasını iddia etməklə. O da sirr deyil ki, bu biabırçı "reklam kampaniyası"nın arxasında "Mercedes-Benz Azerbaijan" şirkəti dayanır. Hər halda hansısa bir amerikalının və ya almanın Azərbaycan mətbuatında belə bir xəbər yazdırmasını düşünmək gülüncdür. Çox təəssüf ki, 8 Mart beynəlxalq qadınlar günü ərəfəsində Azərbaycan qadınını təhqir edən belə bir xəbərin sifarişini də, sifarişin haqqını da hansısa bir azərbaycanlı verib.

Onlar bu addımı atmaqla təkcə Azərbaycan qadınını təhqir etməyiblər, həm də özlərini biabır edib, şirkətlərinin imicinə ciddi şəkildə ziyan vurublar. Hər halda, normal düşüncəli heç bir insan belə bir "reklam kampaniyası"ndan təsirlənərək "Mercedes-AMG G 63" markalı avtomobil almağa qaçmaz. Bunu etsə-etsə, həmin "reklam"ın ideya müəllifləri ilə eyni təfəkkürlü, xəstə düşüncəli adamlar edər...

Qeyd etdiyimiz kimi, bu "reklam kampaniyası" ötən gündən etibarən sosial mediada ciddi tənqidlərə və etirazlara səbəb olub. Tanınmış marketoloqlar, ictimai şəxslər xəbərə sərt reaksiya verib, bu addımı atanları tənqid ediblər.

PR-çı Azər Nəzərovun biabırçı reklamla bağlı mövqeyi sərt olub: "İndi yəqin "Mercedes-Benz Azerbaijan"dakılar oturub, PR məqalələrinin nə qədər çox oxunduğundan bəh-bəhlə danışırlar. Şirkətin imicini necə zədələdiklərindən, öz sürücülərini necə təhqir etdiklərindən, hətta hər bir "Mercedes-Benz" sürücüsünün zorlama potensialına sahib olduğunu bildirdikklərindən də yəqin xəbərdardırlar. Özü də 8 Mart öncəsi! Kimsə yəqin deyib ki, PR məqaləsi belə olur!!!"