Rusiya prezidenti Vladimir Putin bildirib ki, Qərb ölkələri Ukrayna ilə bağlı Moskva ilə "bərabər” dialoqdan imtina edib və qarşılarına Rusiyanı "zəiflətmək” və "parçalamaq” məqsədi qoyublar.

Qaynarinfo xəbər verir ki, o, bu barədə Çinin "Sinxua” agentliyinə müsahibəsində deyib.

"Qərb elitası israrla Rusiyanı "cəzalandırmağa”, onu təcrid etməyə və zəiflətməyə, Kiyev hakimiyyətini pul və silahla təmin etməyə çalışır. Ölkəmizə qarşı 16 minə yaxın birtərəfli qeyri-qanuni sanksiya tətbiq edilib. Ölkəmizi parçalamaqla hədələyirlər. Onlar bizim xarici aktivlərimizi qeyri-qanuni yolla mənimsəməyə çalışırlar”, – Putin bildirib.

Eyni zamanda, onun fikrincə, məhz Qərbin siyasəti "qlobal təlatümlərə” səbəb olub ki, bunun təzahürlərindən biri də Ukraynadakı müharibə olub. Putin əmin edib ki, Rusiya hərbi münaqişənin sülh yolu ilə "hərtərəfli, davamlı və ədalətli həllini” istəyir.

"Və biz Ukrayna üzrə dialoqa açığıq, lakin bu, münaqişədə iştirak edən bütün ölkələrin maraqlarını, o cümlədən bizim maraqlarımızı nəzərə alan danışıqlar olmalıdır", - Rusiya prezident vurğulayıb. O, danışıqlarda qlobal sabitlik mövzusuna, eləcə də "həm qarşı tərəfə, həm də Rusiyaya təhlükəsizlik təminatlarına” toxunmağı tələb edib.

Putin qeyd edib ki, zəmanətlər "etibarlı” olmalıdır. Onun fikrincə, bu, əsas problemdir, çünki Qərb "beynəlxalq hüquqa əsaslanan deyil”, "mövcud siyasi vəziyyətdən və onları uyduranların maraqlarından asılı olaraq dəyişən” qaydalar əsasında qurulan dünya nizamına üstünlük verir.

Eyni zamanda, Putin Çinin müharibənin başlanmasının birinci ildönümündə təqdim olunan və 12 bənddən ibarət böhranın sülh yolu ilə həlli planını dəstəkləyib. "Biz Çinin Ukrayna böhranının həllinə yanaşmalarını müsbət qiymətləndiririk. Pekin onun əsas səbəblərini və qlobal geosiyasi əhəmiyyətini çox yaxşı başa düşür”, - Kreml rəhbəri qeyd edib.

Üstəlik, Putin apreldə Almaniya kansleri Olaf Şoltsla danışıqlar zamanı Çin prezidenti Si Szinpinin səsləndirdiyi əlavə prinsipləri "real və konstruktiv addımlar” adlandırıb. Onlar, Putinin qeyd etdiyi kimi, "soyuq müharibə təfəkkürünə qalib gəlməyin zəruriliyi ideyasını inkişaf etdirirlər”.

Qeyd edək ki, Putin mayın 16-17-də Çinə səfər etməyə hazırlaşır. Bu səfər onun beşinci prezidentlik müddəti başlayandan bəri ilk xaricə səfəri olacaq. Kreml aydınlaşdırıb ki, Putin və Si tərəfdaşlıq məsələlərini, aktual beynəlxalq və regional problemləri müzakirə edəcək, həmçinin "Rusiya-Çin praktiki əməkdaşlığının gələcək inkişafı” istiqamətlərini müəyyən edəcək. Danışıqların nəticəsi birgə bəyanatın və bir sıra ikitərəfli sənədlərin imzalanması olmalıdır.

Nizami Bağırov