Qaynarinfo xəbər verir ki, əksər hallarda kral ailəsinin üzvləri müəyyən edilmiş çərçivəyə uyğun hərəkət etsələr də, zaman-zaman bu qaydalara qarşı çıxanlar da olub. Sevgi və şəxsi seçim uğrunda taxtdan, tituldan və imtiyazlardan imtina edən kral ailəsi üzvləri tarixə düşüblər.

VIII Eduard

1936-cı ildə Kral-İmperator VIII Eduard amerikalı elita nümayəndəsi, iki dəfə boşanmış Uallis Simpson ilə evlənmək istədiyini açıqladıqda Britaniya İmperiyasında konstitusion böhran yarandı. Birləşmiş Krallıq, dominion hökumətləri və İngilis Millətlər Birliyi evliliyə qarşı çıxdı. Dini, hüquqi və siyasi etirazlar səsləndirildi.

İngiltərə kilsəsinin başçısı olan kralın boşanmış və keçmiş həyat yoldaşları sağ olan bir qadınla kilsədə evlənməsi mümkün deyildi. Eduardın qərarından geri çəkilməməsi nəticəsində o, 1936-cı ilin dekabrında taxtdan imtina etdi. Bundan sonra ona Vindzor hersoqu titulu və "Royal Highness” statusu verildi. Eduard və Simpson 1937-ci ildə evləndilər və 35 il kralın ölümünə qədər birlikdə yaşadılar.

Şahzadə Marqaret

Kraliça II Elizabetin kiçik bacısı Şahzadə Marqaret də sevgi uğrunda çətin seçim edən kral ailəsi üzvlərindən olub. O, özündən 16 yaş böyük, boşanmış zabit Peter Tounsend ilə evlənmək istəyirdi. Lakin hökumət və kilsə bu nikaha qarşı çıxdı.

Kraliça bacısından bir il gözləməsini istədi. Nəticədə Marqaret 1960-cı ildə fotoqraf Antoni Armstrong-Cones ilə evləndi. İlk vaxtlarda uğurlu görünən bu evlilik sonradan problemlərlə üzləşdi və cütlük 1978-ci ildə boşandı.

III Çarlz

29 iyul 1981-ci ildə Ledi Diana Spenserlə evlənən Kral III Çarlz sonradan keçmiş münasibəti olan Kamilla Parker Boules ilə əlaqəsini yenidən bərpa etdi. Telefon danışıqlarının mətbuata sızmasından sonra münasibət haqqında ictimaiyyətə açıqlandı. Çarlz və Diana 28 avqust 1996-cı ildə boşandılar. Diana 31 avqust 1997-ci ildə Parisdə avtomobil qəzasında həyatını itirdi.

Bütün tənqidlərə baxmayaraq, Çarlz Kamilla ilə münasibətini davam etdirdi. Onların nişanı 10 fevral 2005-ci oldu və 9 aprel 2005-ci ildə rəsmi nikah bağlandı.

Sasseks hersoqu, Şahzadə Harri

Amerikalı aktrisa Meqan Markl ilə 2018-ci ilin mayında evlənən Şahzadə Harri 2020-ci ilin yanvarında həyat yoldaşı ilə birlikdə kral ailəsindəki rəsmi vəzifələrindən imtina etdiyini açıqladı. Onların bu qərarı dünya mediasında geniş rezonans doğurdu.

Akişino Şahzadəsi Mako Komuro

Yaponiya imperator ailəsinin üzvü, imperator Naruhitonun qardaşı qızı Şahzadə Mako da zadəgan ailədən olmayan sinif yoldaşı ilə evlənmək qərarı verdikdən sonra bütün kral titullarından imtina etdi. O, nikah mərasimini rəsmi imperator protokolu olmadan keçirdi və imperator ailəsindən ayrılan qadın üzvlərə verilən maddi ödənişdən də imtina etdi.

Beləliklə, tarix göstərir ki, kral ailələrində sərt qaydalar hökm sürsə də, bəzi üzvlər şəxsi seçimlərini və sevgini titul və imtiyazlardan üstün tutaraq ənənələrə qarşı çıxmaqdan çəkinməyiblər.

Günay