Deputat Rəfael Hüseynov Elnur Baxışın ittihamlarına cavab verdi (YENİLƏNİB)

Deputat Rəfael Hüseynov Elnur Baxışın ittihamlarına cavab verdi (YENİLƏNİB)

Milli Məclisin deputatı Rəfael Hüseynov yazıçı-publisist Elnur Baxışın ittihamlarına cavab verib.

Rəfael Hüseynov "Deputatla bağlı Baş Prokuror və DTX rəisinə müraciət edildi - Oğurluq iddiası” başlıqlı məqalədə qeyd edilən ittihamlara cavab olaraq Qaynarinfo-ya məktub ünvanlayıb. Həmin məktubu olduğu kimi təqdim edirik:

"Saytınızın yaydığı və həqiqəti əks etdirməyən yazı təəssüf doğurur. Aktyor Yasin Qarayevlə mən çoxdan, 1970-ci illərin ortalarından, ilk tələbəlik illərimdə Azərbaycan televiziyasında verilişlər apardığım çağlardan tanışam. O zaman Gənc tamaşaçılar teatrında çalışan Yasin Qarayev bizim bəzi verilişlərdəki səhnəciklərdə çıxış edirdi. O vaxtdan xoş münasibətlərimiz qalır. Bir neçə il öncə Gənclər Teatrında ona həsr edilən yaradıcılıq gecəsində mənim də söz deməyimi xahiş etdi. Vacib səfərim olsa da, təxirə saldım, gəlib həmin tədbirdə geniş çıxış etdim. Bundan bir qədər sonra onun, digər tanınmış aktyor Tarıyel Vəliyevin təqaüd yaşı ilə bağlı işlədikləri teatrda problemləri yaranmışd. Yanıma gəlmişdilər, dərhal Prezident Adminstrasiyasının müvafiq şöbəsi ilə də, Mədəniyyət Nazirliyi ilə də danışdım, ayrıca məktub yazdım, köməklik göstərilməsini xahiş etdim. Yəni xeyirxah münasibətimi həmişə ifadə etməyə çalışmışam. 

Daha bir görüşümüzdə Yasin Qarayev mənə müraciət edərək onun haqqında xatirələr, təssüratlar toplusu olan bir kitab buraxılacağını, mənim də ora müqəddimə olaraq bir məqalə yazmağımı xahiş etdi. Elektron versiyada materiallar mənə təqdim edildi. Bu, Yasin Qarayevi tanıyan ayrı-ayrı şəxslərin yazdığı kiçik məqalələrdir. Təbii ki, həmin materiallar elektron versiyada özlərində də qalırdı. Materiallarla tanış oldum, düşündüm ki, yazı içərimdə yetişsin, qələmə alım. Bilənlər bilir ki, hər yazının öz üzəçıxma məqamı var, anı çatmalıdır, ürəyin səni vadar etməlidir ki, masa arxasına keçəsən. Görünür, yazının gecikməsi səbəbindən Yasin Qarayev incidi ki, xeyli var əlaqə saxlamır. Həmin yazını isə yalnız bir neçə ay qabaq tamamlaya bildim. Ancaq neyləməli ki, onların gözləməyə səbri çatmadı. Hər halda bəlkə işləri ləngiyər, mənə görə vaxt itirməsinlər deyə, təqdim etdikləri xatirələr toplusunu isə müxtəlif vaxtlarda 2 dəfə Yasin Qarayevin Votsap ünvanına göndərmişəm”.

Qeyd edək ki, yazıçı-publisist Elnur Baxış Milli Məclisin deputatı Rəfael Hüseynova qarşı ağır ittiham səsləndirib. Buna səbəb guya millət vəkilinin onun Xalq artisti Yasin Qarayev haqqında yazdığı kitabın əlyazmasını qaytarmamasıdır.
 
***10 sentyabr, saat 12.38 

Milli Məclisin deputatı Rəfael Hüseynovla bağlı Respublika Prokuroru Kamran Əlivevə və Dövlət Təhlükəsizlik Xidmətinin rəisi Əli Nağıyevə müraciət edilib. 

Bu barədə Qaynarinfo-ya açıqlamasında yazıçı-publisist Elnur Baxış deyib. Yazıçı deputatı dələduzluqda ittiham edir:

"6 il bundan öncə Xalq artisti, Gənc Tamaşaçılar Teatrının aktyoru, rejissor Yasin Qarayev haqqında kitab hazırladıq. Kitabda müxtəlif sənət adamları, şairlər, yazıçılar və başqalarının Yasin Qarayev haqqında fikirlərini soruşduq, hər kəs aktyorla bağlı xatirələrini bölüşdü. Həmin vaxt Yasin müəllimin 70 illik yubileyinə həsr olunan tədbir keçirildi. O tədbirdə Milli Məclisin deputatı Rəfael Hüseynov eşidib ki, Yasin Qarayev haqqında kitab yazılıb, Yasin Qarayevə həmin kitaba ön söz yazmaq istədiyini deyib. Yasin müəllim də onu mənə dedi. Bundan başqa, onu da dedi ki, Rəfael Hüseynov kitabın çapına da kömək edəcək. Biz kitabı aparıb ona təqdim elədik, özümüzdə bir nüxsə saxlamadıq. Mən bilmirəm bu ədəbiyyat, yoxsa mədəniyyət oğrusudur? Yasin Qarayevin indi 76 yaşı var, amma hələ də kitab çap olunmayıb. Hər dəfə gedəndə, yaxud da zəng edəndə köməkçiləri müxtəlif bəhanələr gətirirlər, özü də gah telefonu götürmür, gah da bizdən qaçır. Kitabdan bir nüxsə olsun belə bizdə yoxdur, qalmışıq belə. Nə bilək ki, deputat belə hərəkət edəcək. Maraqlıdır ki, son vaxtlar adamları Azərbaycanda tanınmış şəxslər aldadır, deputatdır deyə kimisə aldatmalı deyil ki. İstəyir ki, hər şey onun adı ilə bağlı olsun. Hər sey onun adı ilə bağlı ola bilməz”.
 


Əli hər yerdən üzülən Elnur Baxış Respublika Prokurorluğu və Dövlət Təhlükəsizlik Xidmətindən yardım istəyir:

"Əlacım hər yerdən kəsilib. Kamran Əliyev və Əli Nağıyev cənablarına müraciət edirəm. Mən mədəniyyətə və ədəbiyyata xidmət edən adamam. Deputat olanda nə olar ki... Çox maraqlıdır, sabiq deputat Eldəniz Səlimovu polisi döydüyünə görə həbs etdilər, mandatını da əlindən aldılar. Amma Rəfael Hüseynovun bu hərəkətlərinə görə ona söz deyən yoxdur. Heç elə bil, belə hərəkət etməyib, başqasının yazdığı kitabı oğurlamayıb. Onun kimi mən də bu dövlətin övladıyam. Mən də dövlətə qələmimlə xidmət edirəm. Aidiyyatı orqanlardan xahiş edirəm, mənim Yasin Qarayev haqqında yazdığım kitabın əlyazmasını Rəfael Hüseynovdan alsınlar. Hər bir kitab yazarın övladıdır. Onun bu hərəkəti dələduzluqdur”.

Bahar Rüstəmli
XƏBƏRLƏR
BLOGLAR
X