İtaliyada tərk edilmiş qəsəbələrə həyat verən "1 avroluq ev” layihələri bəzi yerlərdə milyonlarla avroluq iqtisadi canlanma yaradıb. Layihələrin "yenilənmə" və mədəni transformasiya kimi təsirləri isə müzakirə edilir.

Qaynarinfo xəbər verir ki, İtaliyanın kasıb və əhalisi köç edən bölgələrində başlanan "1 avroluq ev” proqramları, tərk edilmiş və ya istifadə olunmayan daşınmaz əmlaklara yeni həyat verməyi hədəfləyir.

Əvvəlcə yaxşı bir fürsət kimi görünsə də, bu təşəbbüslərin əslində iqtisadi böhran içində olan qəsəbələrin xaricdən investor və yeni sakin cəlb etməyə yönəlmiş boş planlar olduğu qısa müddətdə üzə çıxır.

Bir fincan qəhvədən daha ucuz ev

İllərlə aparılan reklam kampaniyaları bu layihələrə böyük diqqət çəkdi və dünyada geniş maraq doğurdu. Bəzi qəsəbələr satışa çıxardıqları bütün evləri qısa müddətdə satdı.

"Bir fincan qəhvədən ucuz başa gələn ev” ifadəsi, beynəlxalq alıcıların diqqətini cəlb etdi və İtaliyanın ən ucqar nöqtələrində belə yeni həyat ümidləri doğurdu.

Bir neçə il ərzində təmir şərti

Lakin sistemin işləmə prinsipi müəyyən incəlikləri də ehtiva edir. Bir çox bələdiyyə, alınan evlərin bir neçə il ərzində bərpa edilməsini şərt kimi qoyur. Tələb çox olduğuna görə evlər adətən açıq hərracla satılır və yekun satış qiyməti 1 avronun çox üzərində olur.

Proqramlara dair ən diqqət çəkən mübahisələrdən biri isə etik tərəfidir. Yerli xalqla heç bir əlaqəsi olmayan insanların yalnız maddi imkanlarına görə bu qəsəbələrə köçməsi, "yenilənmə" və mədəni transformasiya kimi narahatlıqlara səbəb olur.

Yeni qəsəbələr də proqrama qoşulur

Bütün bu mübahisələrə baxmayaraq, proqramlara maraq davam edir. Şimali Sardiniyada yerləşən Sedini qəsəbəsi də bu trenda qoşulmağa hazırlaşır.

Milandan yeni köçmüş 60 yaşlı Liliana Forina, qəsəbənin öz "1 avroluq ev” təşəbbüsünə başlamaq üçün hazırlıq gördüyünü bildirir. Dənizə yaxınlığı və tarixi ab-havası ilə diqqət çəkən Sedini yeni sakinlərini gözləyir.

125 ev satıldı, 7 milyon avro qazanıldı

"1 avroluq ev” proqramlarının uğuruna dair çoxsaylı iddialar əsasən fərdi təcrübələrə əsaslansa da, bəzi yerli məlumatlar bu təşəbbüslərin iqtisadi potensialını göstərir.

Bu uğur nümunələrindən biri Siciliyanın mərkəzində yerləşən təxminən 10 min əhalisi olan Mussomeli qəsəbəsidir. 2017-ci ildə başlanan kampaniya çərçivəsində bu günə qədər 125-dən çox ev satılıb. Bələdiyyə rəsmilərinə görə, bu satışlar tikinti şirkətləri, sənətkarlar, restoranlar və otellər başda olmaqla, qəsəbənin yerli iqtisadiyyatına təxminən 7 milyon avro dəyərində töhfə verib.

İnkişaf təkcə əmlak satışları ilə məhdudlaşmayıb. 2018 və 2019-cu illərdə təxminən 6 min insan yalnız bu evləri görmək üçün Mussomeliyə baş çəkib.

Bu da bölgədəki restoranlar, otellər və digər xidmət sahələri üçün əhəmiyyətli bir gəlir mənbəyi yaradıb.

Günay