Neft 80 dollara yüksələ bilər: nə vaxt və necə?

Bütün dünya üzrə neft sektoruna investisiyaların azaldığı bir dövrdə, "Brent" markalı neftin qiyməti yaxın 5 ildə cari qiymətlərə nisbətən 40% artaraq, 80 dollar/barelə yüksələ bilər.

"Qaynarinfo" Report-a istinadən xəbər verir ki, bu açıqlamanı Nyu-Yorkda keçirilən mətbuat konfransında "S&P Global Platts" informasiya agentliyinin bölməsi olan "Pira Energy"nin qurucusu Qari Ros (Gary Ross) verib.

Q.Ros qeyd edib ki, ABŞ şist neft sektorunun inkişafı və elektromobillərin sayının artması ilə bağlı yaranan qeyri-müəyyənliklər neftin qiymətini daha da artırır: "İnvestisiyalar azalır. Şist neft və elektromobil sektorlarının inkişaf etdiyi dövrdə kim neftə investisiya yatırar?!"

Analitik hesab edir ki, hazırda neft ehtiyatlarının həcmi şişirdilir. OPEC neft ehtiyatlarının orta 5 illik neft ehtiyatlarından 170 mln. barel çox olduğunu bildirsə də, bu miqdar 50 mln. bareldən çox deyil və azalmağa davam edir: "Artıq neft ehtiyatları absorbsiya olunub. Biz bir daha 30 dollar/barel səviyyəsini görməyəcəyik. Amma hələlik 50-60 dollar/barel qiyməti ilə yaşamağa davam edəcəyik".

Xatırladaq ki, neft sahəsində söz sahibi olan Q.Ros 2014-cü ildə neft qiymətlərində kəskin azalma proqnozunu verib.

Qaynarinfo.Az