Peskov Rusiyaya qarşı hazırlanmış qorxunc sanksiyalardan danışdı

Qaynarinfo TASS-a istinadla xəbər verir ki, bu barədə Rusiya Federasiyası prezidentinin mətbuat katibi Dmitri Peskov məlumat verib.

"Bu bəyanatları və danışıqları vaxtında birləşdirmək Moskvaya təzyiq cəhdidir. Bu, apriori mənasızdır, çünki mahiyyətinə görə və qaçılmaz adekvat cavabı nəzərə alaraq, əslində münasibətləri kəsmək təşəbbüsü ilə eyniləşdirilə bilən sanksiyalardan danışırıq”, - deyə o bildirib.

Bundan əvvəl ABŞ Senatının Rusiyanın dövlət borcuna, bank sektoruna və bəzi məmurlara qarşı yeni sanksiyalar paketinin layihəsi dərc olunmuşdu. Məhdudiyyətlərə prezident Vladimir Putin, baş nazir Mixail Mişustin, xarici işlər naziri Sergey Lavrov, müdafiə naziri Sergey Şoyqu, Rusiya Federasiyası Silahlı Qüvvələrinin Baş Qərargah rəisi Valeri Gerasimov, eləcə də "silahlı qüvvələrin müxtəlif qollarının, o cümlədən hava qüvvələri və donanma komandirləri daxildir. Bundan əlavə, siyahıdan ən azı üç təşkilata qarşı sanksiyaların tətbiqi təklif olunur: Sberbank, VTB, Qazprombank, VEB, RDIF, MKB, Alfa-Bank, Rosselxozbank, Otkritie, Promsvyazbank, Sovcombank, Transcapitalbank.

Sanksiyalar paketinə əmlakla və ya sanksiyaya məruz qalan şəxslərin maraqları ilə bağlı hər hansı əməliyyatların bloklanması və qadağan edilməsi daxildir. Onların ABŞ-a girişi də qadağan ediləcək və siyahıda olanlar viza və ya digər səyahət sənədləri ala bilməyəcəklər. ABŞ-a girişə icazə verən əvvəllər verilmiş sənədlər ləğv ediləcək.

Layihə SWIFT kimi maliyyə mesajlaşma vasitələrinə sanksiya tətbiq etmək hüququ verir, sanksiyalar altında olan banklara xidmətlərin göstərilməsinin dayandırılması üçün tədbirlər haqqında hesabat tələb edir, Rusiyanın ilkin və ikinci dərəcəli dövlət borcu ilə əməliyyatları qadağan edir. Layihə həmçinin "Şimal axını 2” qaz kəmərinə və onun podratçılar və operatorlarına qarşı sanksiyaları əhatə edir.

Senatorların düşündüyü kimi məhdudiyyətlər Rusiyanın Ukraynaya müdaxiləsi halında ABŞ prezidenti tərəfindən tətbiq edilməlidir.

ABŞ Dövlət Departamentinin sözçüsü Ned Prays bildirib ki, əgər Rusiya Ukrayna ilə vəziyyəti həll etmək üçün diplomatik yol seçsə, sanksiyalar tətbiq olunmayacaq.

Daha əvvəl Rusiya Federasiyası Prezidentinin mətbuat katibi Dmitri Peskov bildirmişdi ki, yeni anti-Rusiya sanksiyaları təhlükəsi təhlükəsizlik zəmanətləri üzrə məsləhətləşmələrdən əvvəl bir növ artilleriya hazırlığıdır.