Tavanda yaranan su ləkələri evdə tez-tez rast gəlinən problemlərdən biridir. Belə ləkələr yalnız görünüşü korlamır, həm də dam örtüyündə, santexnika sistemində və ya havalandırmada problem olduğunu göstərə bilər.

Qaynarinfo “Southern Living” nəşrinə istinadən xəbər verir ki, təmizlik üzrə mütəxəssis Sara Aparasio tavandakı həm təzə, həm də köhnə su ləkələrini sadə vasitələrlə aradan qaldırmağın yollarını açıqlayıb.

Mütəxəssis ilk növbədə ləkənin səbəbini müəyyənləşdirməyin vacib olduğunu bildirir. Tavanda su ləkələrinin yaranmasına ən çox dam örtüyünün zədələnməsi, santexnika sızmaları, su axarlarının tutulması və zəif havalandırma səbəb olur.

Problemin mənbəyi aradan qaldırılmadan ləkəni təmizləmək tövsiyə edilmir. Əks halda ləkə yenidən yarana və ya daha da böyüyə bilər.

Təzə su ləkəsini necə təmizləmək olar?

Sara Aparasio bildirir ki, tavanda təzə su ləkəsi yaranıbsa, tez hərəkət etmək lazımdır. Bunun üçün sirkə məhlulundan istifadə etmək olar.

Ağ sirkə ilə suyu bərabər miqdarda qarışdırın və çiləyici qaba tökün.

Məhlulu ləkənin üzərinə çox islatmadan püskürdün.

Sirkə məhlulunun ləkəyə hopması üçün 10-15 dəqiqə gözləyin.

Təmiz süngər və ya parça ilə ləkəni kənarlardan mərkəzə doğru yüngülcə silin və qurulayın.

Lazım gələrsə, prosesi təkrarlayın.

Daha sonra həmin nahiyəyə su püskürdərək məhlulu yuyun.

Təmiz parça və ya süngərlə səthi qurulayın.

Köhnə ləkələr üçün başqa üsul

Mütəxəssisin sözlərinə görə, köhnə su ləkələrini təmizləmək daha çətindir. Çünki belə ləkələr səthə daha dərindən hopur və daha tünd, sarımtıl görünə bilər.

Bu halda ağardıcı vasitədən istifadə etmək tövsiyə olunur. Bunun üçün:

qoruyucu eynək, əlcək və maska taxın;

ağardıcının bir hissəsini üç hissə su ilə qarışdırın;

məhlulu çiləyici qaba tökün;

səthi həddindən artıq islatmadan ləkənin üzərinə püskürdün;

10-15 dəqiqə gözləyin;

təmiz parça və ya süngərlə ləkəni yüngülcə silin;

lazım gələrsə, prosesi təkrarlayın;

daha sonra su ilə səthi yuyun və quru parça ilə qurulayın.

Ləkənin üzərini birbaşa rəngləmək olmaz

Mütəxəssis su ləkəsinin səbəbi aradan qaldırılmadan həmin ərazinin üzərinə boya çəkilməsini məsləhət görmür.

Onun sözlərinə görə, əksər tavan boyaları səthin “nəfəs almasına” imkan vermir. Buna görə də boya qatının altında qalan sızma və ya nəmlik zamanla problemi daha da ağırlaşdıra bilər.

Ləkə təmizləndikdən sonra isə tavanı yenidən rəngləmək mümkündür. Bunun üçün əvvəlcə mövcud tavanın rənginə uyğun ləkə örtücü astar, daha sonra isə yeni boya qatı çəkilməlidir.

Köhnə ləkələrdə rəng dəyişikliyinin yenidən üzə çıxmaması üçün tam astarlama və yenidən rəngləmə tələb oluna bilər.

Təmizləyərkən bunlara diqqət edin

Mütəxəssis təmizliyə başlamazdan əvvəl ləkənin altındakı mebel və döşəməni qorumağı tövsiyə edir. Bunun üçün həmin əraziyə brezent və ya polietilen örtük sərmək olar.

Həmçinin ləkəni güclü şəkildə sürtmək və səthi qaşımaq olmaz. Bu, ləkənin daha dərinə keçməsinə səbəb ola bilər. Bunun əvəzinə süngər və ya parça ilə yüngülcə silmək və qurulamaq məsləhətdir.

Əgər ləkə böyükdürsə, daim yenidən yaranırsa və ya binanın konstruksiyası ilə bağlı problemdən qaynaqlanırsa, mütəxəssisə müraciət etmək daha məqsədəuyğundur.

Günay