Qaynarinfo xəbər verir ki, "Fortune” nəşrinin yazdığına görə, NATO-nun Avropadakı Birləşmiş Qüvvələrinin Ali Komandanı, general Aleksus Qrinkeviç ABŞ-ın regionda Alyans əməliyyatları üçün ayırmağa hazır olduğu hərbi texnikanın həcmini azaltdığını elan etməsindən sonra Rusiyanın mümkün hücumu halında Avropanın müdafiəsi ilə bağlı alternativ planları nəzərdən keçirir.

Nəşrdə qeyd olunur ki, NATO-nun standart müdafiə planı sülh dövründə, böhran və ya müharibə zamanı 32 üzv ölkənin qüvvələrinin cəlb edilməsini nəzərdə tutur. Plan komandirlərin istənilən münaqişənin ilk altı ayı ərzində mərhələli şəkildə istifadə edə biləcəyi hərbi resursları müəyyənləşdirir. Lakin may ayında ABŞ Müdafiə Nazirliyi digər regionlardakı potensial təhdidlərə diqqət ayırmaq məqsədilə öhdəliklərini azaltacağını NATO müttəfiqlərinə bildirib.

NATO daxilindəki narahatlıqlara baxmayaraq, Qrinkeviç vurğulayıb ki, ABŞ hələ də "Alyansa məhdud, lakin kritik əhəmiyyət daşıyan imkanlar təqdim etməyə” sadiqdir.

"Biz tez əldə edilə, tez yerləşdirilə, sürətlə genişləndirilə və uzun müddət dəstəklənə bilən vasitələrə diqqət yetirməliyik. Bu, həm uzaqmənzilli sistemlərə, həm də pilotsuz uçuş aparatlarına aiddir. Belə imkanlar çəkindirmə və müdafiə zərurəti yaranacağı halda qısamüddətli riskləri azaltmağa kömək edə bilər”, deyə general "ILA Berlin Air Show” aviasiya sərgisində bildirib.

Nəşr əlavə edir ki, iyunun 2–3-də keçirilən NATO müttəfiqlərinin görüşündən sonra Qrinkeviç ABŞ-ın qərarından sonra yaranan boşluqların Avropa müttəfiqləri və Kanada tərəfindən doldurulmalı olduğunu qeyd edib. O, bu ölkələri pilotlu və pilotsuz uçuş aparatları, həmçinin hərbi-dəniz gəmiləri təqdim etməyə çağırıb.

"Bu, indi və yaxın perspektivdə baş verməlidir”, deyə general vurğulayıb.

Məqalədə xatırladılır ki, ABŞ-ın böhran vəziyyətində NATO-ya təqdim etməyə hazır olduğu hərbi texnikanın nə qədər azalacağı hələ tam məlum deyil. Bəzi Qərb KİV-lərinin məlumatına görə, söhbət müşayiət edən hərbi gəmilər və təyyarələr qrupu ilə birlikdə bir aviadaşıyıcıdan, bir sualtı qayıqdan, hava yanacaqdoldurma təyyarələrindən və onlarla qırıcı təyyarədən gedir.

Bütün narahatlıqlara baxmayaraq, Qrinkeviç bildirib ki, kəşfiyyat hesabatları və Rusiya qoşunlarının hərəkəti Moskvanın "Alyansla münaqişəyə can atmadığını” göstərir. Onun sözlərinə görə, Rusiya hazırda Ukraynaya qarşı müharibədə ciddi şəkildə məşğuldur və kifayət qədər sayda hərbçi cəlb etməkdə çətinliklərlə üzləşir.

ABŞ Avropadan yüzlərlə texnika vahidini çıxarır – nə məlumdur

Xatırladaq ki, "The New York Times” iki yüksək vəzifəli Avropa rəsmisinə istinadən yazıb ki, iyunun əvvəlində Vaşinqton NATO müttəfiqlərinə yazılı sənəd göndərərək Avropadakı NATO əməliyyatları üçün ayrılan döyüş təyyarələri və hərbi gəmilərin sayının nə qədər azaldılacağını izah edib.

Sənədə əsasən, F-16 və F-15E qırıcılarının sayı təxminən 150-dən 100-ə enəcək. Dəniz patrul və kəşfiyyat təyyarələrinin sayı 26-dan 15-ə düşəcək, Avropada istifadə üçün nəzərdə tutulan bütün səkkiz hava yanacaqdoldurma təyyarəsi isə tamamilə geri çəkiləcək.

Bundan əlavə, sənəddə ABŞ-ın raket buraxılışı üçün nəzərdə tutulmuş bir sualtı qayığı, bir aviadaşıyıcını, bir neçə yerüstü hərbi gəmini və aviadaşıyıcı bazalı onlarla reaktiv təyyarəni başqa bölgələrə yönləndirəcəyi qeyd olunur. Əvvəllər Avropanın müdafiəsi üçün ayrılmış iki strateji bombardmançı qrupundan biri də qitədən çıxarılacaq.

"Politico” nəşri hesab edir ki, bu addımlar ABŞ-ın Avropanın təhlükəsizlik sistemini zəiflətməsinə gətirib çıxarır. ABŞ Prezidenti Donald Trampın mövqeyi göstərir ki, o, sələfləri ilə müqayisədə Avropanın təhlükəsizliyinə daha az önəm verir.

Aydın