Noyabr ayı, avro üçün 2022-ci ilin əvvəlindən bəri ən pis ay ola bilər. Analitiklər xəbərdarlıq edirlər ki, avronun kəskin dəyişiklikləri, avqust ayında yapon yeninin kəskin hərəkətlərindən sonra qlobal bazarlarda yenidən dalğalanmalara səbəb ola bilər.

Qaynarinfo xəbər verir ki, noyabrın əvvəlindən avro ABŞ dollarına nisbətdə təxminən 3,3% ucuzlaşıb və sürətlə paritetə — 1 dollar səviyyəsinə yaxınlaşır.

Buna Donald Trampın idxala tətbiq edəcəyi tariflərlə bağlı verdiyi vədlər, Avrozonanın iqtisadi zəifliyi və Rusiya-Ukrayna münaqişəsinin kəskinləşməsi səbəb olub. Eyni zamanda, ABŞ-da iqtisadi artım gözləntiləri dolların və ABŞ səhmlərinin mövqeyini gücləndirir.

Buna baxmayaraq, investorlar və valyuta treyderləri avronun gələcəyi ilə bağlı fikir ayrılığına düşüblər. ABŞ dolları da ticarət tariflərinin inflyasiya təzyiqi və dövlət borcunun artması ilə əlaqədar təzyiqlərə məruz qalır ki, bu da Amerika bazarına olan etibarı zəiflədir.

Volatilliyin artma riski

Analitiklərin fikrincə, əgər avro daha da ucuzlaşarsa, qeyri-müəyyənlik artacaq və qəfil valyuta dəyişiklikləri riski yüksələcək. Bu, Trampın prezidentliyinə və ABŞ səhmlərinin artımına stavka edən treyderlərin zərər çəkməsinə səbəb ola bilər.

Societe Generale-dən Kit Yuces deyir:

"İnsanlar düşünməyə başlayacaq ki, biz pariteti keçəcəyik, yoxsa mövqelər bərpa olunacaq? Bu, volatilliyi artıracaq".

Avqust ayında yapon yeninin dəyişməsi fonunda yaranmış vəziyyət artıq göstərdi ki, populyar mövqelərin qəfil bağlanması bazarı çökməyə yaxınlaşdıra bilər.

Avro/dollar cütlüyü və qlobal iqtisadi təsirlər

Avro/dollar dünyanın ən çox ticarət olunan valyuta cütlüyüdür. Bu cütlükdə sürətli hərəkətlər beynəlxalq korporasiyaların gəlirlərini, həmçinin idxal olunan xammalın qiymətindən asılı olan iqtisadi artım və inflyasiya perspektivlərini poza bilər.

Barclays-dən Temos Fiotakis bildirib ki, avronun ucuzlaşması Çin, İsveçrə və Cənubi Koreya kimi xarici ticarətə həssas ölkələrin valyutalarının da dollar qarşısında zəifləməsinə səbəb ola bilər.

Böyük Britaniya funtunun noyabr ayı ərzində dollara qarşı 2%-dən çox ucuzlaşması isə avronun dəyişikliklərinə qarşı həssaslığını göstərir.

Valyuta bazarındakı qeyri-müəyyənlik artdıqca, investorlar hedcləmə alətlərinə müraciət edir. UBS-dən Alvize Marino qeyd edir ki, mövcud risklər bazarların qiymətləndirdiyindən daha yüksəkdir və investorlar bu dəyişikliklərdən qorunmaq üçün daha ciddi tədbirlər görməlidir.

Gələcək üçün proqnozlar

HSBC-dən Vilem Sels avronun 2024-cü ilin ortalarına qədər 0,99 dollar səviyyəsinə düşəcəyini gözləyir. Digər tərəfdən, Amundi-dən Vinsent Mortye isə Avrozonada faiz dərəcələrinin azalmasının iqtisadi xərcləri artıraraq avronu 2025-ci ilin sonuna qədər 1,16 dollara yüksəldə biləcəyini düşünür.

Avro və dolların istiqaməti ilə bağlı fərqli proqnozlar, gələcəkdə daha böyük valyuta dalğalanmalarının mümkünlüyünə işarə edir. Bu dəyişikliklər isə yalnız Avropa deyil, qlobal maliyyə bazarlarını da təsirləndirə bilər.

Alpər