Azərbaycanda nazir və deputatların getdiyi hamam (FOTOLAR)

Qaynarinfo "Sputnik Azərbaycan”a istinadən "Qasımbəy hamamı"ndan reportajı təqdim edir:

Keçmiş zamanlarda Bakıda belə hamamların sayı çox olub, çünki onda kanalizasiya və su sistemləri hər evdə olmayıb. Bu indidir ki, biz səhərlər duş qəbul edib işə qaçırıq.

 

Keçmişdə şəhər sakinləri üçün çimmək mərasimi əsl bayram olub. Təəssüf ki, hazırda köhnə hamamların əksəriyyəti dəhşətli vəziyyətdədir. Ona görə də bağlanıb.

"Qasımbəy hamamı"nın isə başqalarından fərqli olaraq bəxti gətirib. Çünki sahibləri onun mövcudluğunu qorumaq üçün mümkün olan hər şey ediblər. Hamam Azərbaycan Respublikası ərazisində dövlət tərəfindən qorunan tarix və mədəniyyət abidələrinin siyahısındadır. O, Bakı hamamları arasında ikinci ən məşhur hamam sayılır. Çünki bu hamamdan indiyə qədər də azərbaycanlılar və turistlər istifadə edir. Bununla əlaqədar olaraq, "Qasımbəy hamamı"nın rəhbərliyi 2018-ci ildə onun 140 illik yubileyini yüksək səviyyədə qeyd etmək niyyətindədir. Bu yubiley mərasiminə yerli məşhurların da dəvət edilməsi planlaşdırılıb.

Hamamın sahibi deyir ki, "Qasımbəy hamamı" 1878-ci ildə o zamanların məşhur milyonçusu, mesenat Qasım bəy tərəfindən tikdirilib və hamam elə onun adını daşıyır. Müəssisə rəhbərinin sözlərinə görə, hamamın binası sənədlərdə göstəriləndən daha qədimdir. Hazırda o, hamam binasının tarixini ətraflı öyrənməklə məşğuldur ki, onun inşa edildiyi ili dəqiq müəyyənləşdirsin.

Mülkiyyətçinin sözlərinə görə, o dövrlərdə islam qaydalarına əsasən məscidlərin yaxınlığında hamam da tikilməli idi ki, inanclı insanlar ibadətdən əvvəl yuyuna və dəstəmaz ala bilsinlər. Bununla əlaqədar olaraq, Qasım bəy əvvəlcə məscid tikdirib, sonra isə onun yanında Bakı sakinləri arasında çox populyar olan hamamı inşa etdirib.

 

Sovet İttifaqı dağılandan sonra demək olar ki, bütün məişət və xidmət obyektləri özəlləşdirilməyə başladı. Məhz həmin vaxt, 1994-cü ildə hamamın hazırkı direktorunun atası bu hamamı özəlləşdirib və onun mülkiyyətçisinə çevrilib. Hamamı alandan sonra sahibi onu yalnız kişilərin istifadəsi üçün nəzərdə tutub. Direktorun sözlərinə görə, onlar Şəki və Biləsuvar əsilli olduqları üçün hər iki şəhərin adından ilk iki hərfi götürərək hamamı "ŞəBi" adlandırıblar. Hazırda Bakı sakinlərinin əksəriyyəti sözügedən hamamı bu adla tanıyır. Lakin sahibi hamamın adını yenidən dəyişmək niyyətindədir və yeni adı hamamın yubileyində elan edəcək.

 

"Mən ilk dəfə bu hamama gələrkən divarlardakı kafeli görəndə dərhal məşhur Azərbaycan filmi olan, daha çox "Papaq" adı ilə tanınan "Evlənmək istəyirəm" filmini xatırladım. Sən demə, filmdəki həmin epizod məhz elə bu hamamda çəkilib. Bu günlərdə, yaxında premyerası olacaq "Tayson" filminin bir neçə kadrı da bu hamamda çəkilib" – deyə direktor bildirib.

 

Hamam xüsusi mülkiyyətə çevriləndən sonra, hazırkı sahibinin ilk işi hamamı əsaslı bərpa etmək olub. Çünki hamam onda çox bərbad vəziyyətdə imiş. Hazırda hamam köhnəsinin tam əksidir. Burada müştərilərin rahatlığı üçün hər cür şərait yaradılıb.

Direktor qeyd edib ki, təmir zamanı köhnə hamamın yarandığı gündən burada olan bir sıra əşyalarını qoruyub saxlamağa çalışıblar. Misal üçün hazırda böyük qiyməti olan mebel və rəsmlər hamamda qalır. Amma direktorun onlardan ayrılmaq fikri yoxdur. O, həmçinin qeyd edib ki, təmir hamamın qədim ruhunu qoruyub saxlamaq üçün köhnə stildə aparılıb.

 

Hazırda hamamda VIP-müştərilər üçün və sadə adamlar üçün kabinetlər mövcuddur. Çünki bu hamamın özəl qonaqları arasında bir çox nazirlər, deputatlar, Milli Məclisin üzvləri və məşhur şəxsiyyətlər olur. Direktor qeyd edib ki, hamamın ziyarətçilərinin ilk işi duş qəbul etməkdir. Duşdan sonra onlar buxar otağına gedirlər. Çimmək mərasimi hovuzla tamamlanır. Bütün bunlar müştərilərin istəyindən asılıdır.

 

Bu hamama ən çox qışda tələbat olur. Buxar otağı insanın bədənindən zərərli maddələrin çıxarılmasına və onu sağlamlaşdırmağa qadirdir. Hamamı əsasən bazar günləri ziyarət edirlər. Amma elə insanlar da var ki, onlar hər gün işdən sonra dincəlmək üçün hamam gedirlər.