Azərbaycanda xəstəxanaların akkreditasiya qaydası hazırlanacaq

Azərbaycanda xəstəxanaların akkreditasiya qaydası hazırlanacaq

Azərbaycanda tibb müəssisələrinin akkreditasiya qaydasının layihəsi hazırlanacaq.

Qaynarinfo APA-ya istinadən xəbər verir ki, bununla bağlı Baş Nazir Əli Əsədov müvafiq sərəncam imzalayıb.

Sərəncamia əsasən, Səhiyyə Nazirliyi Ədliyyə Nazirliyi, İcbari Tibbi Sığorta üzrə Dövlət Agentliyi və icra prosesində müəyyən ediləcək digər aidiyyəti dövlət orqanları (dövlətin hüquqi şəxsləri) ilə razılaşdırmaqla tibb müəssisələrinin akkreditasiya qaydasının layihəsini bir ay müddətində Nazirlər Kabinetinə təqdim etməlidir.

Qed edək ki, "Əhalinin sağlamlığının qorunması haqqında” Azərbaycan Respublikasının Qanununda dəyişiklik edilməsi barədə” 2019-cu il 27 iyun tarixli qanuna əsasən, tibb müəssisələri akkreditasiyadan keçməlidir. Qanuna əsasən, tibb müəssisələrinin akkreditasiyası əhaliyə göstərilən tibbi xidmətin keyfiyyətinin, tibb müəssisələrinin fəaliyyətinin normativ hüquqi aktların tələblərinə uyğunluğunun müəyyən edilməsi və əhalinin yüksək keyfiyyetli tibbi xidmət göstərən tibb müəssisəsi tərəfindən müayinə və müalicə olunması üçün seçim hüququnun təmin edilməsi məqsədilə aparılır. Tibb müəssisələrinin akkreditasiyası qaydasını Nazirlər Kabineti təsdiq edir.

Tibb müəssisələrinin akkreditasiyasına görə "Dövlət rüsumu haqqında” qanunla  müəyyən edilmiş məbləğdə dövlət rüsumu tutulur. Tibb müəssisələrinin akkreditasiyası hər 5 ildən bir həyata keçiriləcək. Akkreditasiyadan keçən tibb müəssisələrinə akkreditasiya haqqında şəhadətnamə veriləcək.

Baş Nazirin imzaladığı sərəncama əsasən,  Ədliyyə Nazirliyi Səhiyyə Nazirliyi, İcbari Tibbi Sığorta üzrə Dövlət Agentliyi və icra prosesində müəyyən ediləcək digər aidiyyəti dövlət orqanları (dövlətin hüquqi şəxsləri) ilə razılaşdırmaqla tibb müəssisələrinin akkreditasiyasını həyata keçirəcək müvafiq icra hakimiyyəti orqanı (qurum) barədə təkliflərini 10 gün müddətində Nazirlər Kabinetinə təqdim etməlidir.

Xatırladaq ki, gələn il yanvarın 1-dən Azərbaycanda icbari tibbi sığorta tətbiq ediləcək və xəstəxanalar İcbari Tibbi Sığorta üzrə Dövlət Agentliyinin nəzdindəki "Tibbi Ərazi Bölmələrinin İdarəetmə Birliyi” (TƏBİB) publik hüquqi şəxsin tabeliyinə veriləcək.

Yalnız Məhkəmə Psixiatrik Ekspertiza Mərkəzi, Məhkəmə Tibbi Ekspertiza və Patoloji Anatomiya Birliyi və onun şöbələri, Respublika Gigiyena və Epidemiologiya Mərkəzi, habelə onun tabeliyindəki dezinfeksiya stansiyaları və profilaktik dezinfeksiya şöbələri, Əczaçılıq və Tibb Sənayesi Birliyi, tibb tədris müəssisələri, Akademik Zərifə Əliyeva adına Milli Oftalmologiya Mərkəzi və onun Masallı rayon filialı, Milli Onkologiya Mərkəzi və onkoloji xəstəxanalar (dispanserlər), Respublika Leproz (Cüzam) Xəstəxanası, taun əleyhinə stansiya və şöbələr, İctimai Səhiyyə və İslahatlar Mərkəzi, Respublika QİÇS-lə Mübarizə Mərkəzi, ailə planlaması məsləhətxanaları və mərkəzləri, ailə və nikah məsləhətxanaları, "Tibb” qəzeti, "Azərbaycan Tibb Jurnalı”, Azərbaycan Respublikası Dövlət Elmi-Tibbi Kitabxanası, Azərbaycan Təbabəti Muzeyi, "Dərman Vasitələrinin Analitik Ekspertiza Mərkəzi” və "Azərtibbtəchizat” məhdud məsuliyyətli cəmiyyətləri, İnnovasiya və Təchizat Mərkəzi, sanatoriyalar və kurort üsulları ilə müalicə edən tibb müəssisələri, Bakı Sağlamlıq Mərkəzi, Talassemiya Mərkəzi və Tikilməkdə Olan Müəssisələrin Müdiriyyəti Səhiyyə Nazirliyinin tabeliyində qalacaq.
XƏBƏRLƏR
BLOGLAR