Bu gün təkcə ölkəmizdə deyil, dünyada gedən proseslər daha çox hadisələrə, informasiyalara söykənib. Yəni bəşər övladı internet texnologiyalarından bəhrələnərək dünyanın istənilən ölkəsində baş verən hadisədən zamanında məlumatlanıb. Bu, müsbət olduğu qədər də özündə mənfi çalarlar da ifadə edir. Yəni ilk məlumat, ilk informasiya hansı məqsədlə ötürülürsə, insanlar da öncə onu qəbul edirlər. Bu impulsun arxasında dayanan maraq həmişə hadisənin mahiyyətini dəyişir. Və nəticədə də bir çox hallarda gerçək arxa planda qalır. İnformasiyanın sifarişçisi, yayıcısı, onu tirajlayan isə ilk anda öz məqsədinə çatır. Sonra artıq ikinci mərhələ başlayır. Araşdırmalar, təkziblər və yaxud təsdiqlər həmin informasiyanın gerçək üzünü ortaya çıxarır. Bu da təbii ki, həm cəmiyyətdə bir ajiotaja, müəyyən qüvvələrin fəallığına səbəb olur, həm də gerçəyi ifadə etmək üçün, gerçəyi göstərmək üçün əlavə tədbirlər görmək, geniş fikir mübadiləsi etmək zərurəti ortaya çıxır. Bax, bu dediyimizin fonunda ölkəmizdə baş verən sonuncu hadisənin mahiyyətini göz önünə gətirirəm. Və birmənalı şəkildə görürəm ki, Gəncədə baş verən hadisə tam şəkildə cinayətdi, terrordu. Sadəcə, bu cinayəti, bu terroru pərdələmək və onun arxasında duran maraqları gizlətmək üçün internet şəbəkədən, elektron mediadan sürətli və şəbəkəli şəkildə istifadə olunur. Azərbaycan insanının bütün diqqəti hadisənin mahiyyətinə yox, baş verən cinayətin özünə deyil, ölkədə qarşıdurma yaratmağa, insanları məmurlardan, dövlətdən narazı salmağa yönəldilib. Bu da açıq şəkildə göstərir ki, Gəncə şəhər icra hakimiyyəti başçısına atılan güllələr öncədən düşünülmüş, planlaşdırılmış və hətta müəyyən təşkilatlar tərəfindən sifariş verilmiş terror hadisəsidir.

Bir anlıq gözümüzün önünə ötən əsrin 90-cı illərini gətirək. Ayrı-ayrı qrupların Azərbaycanı parçalamaq, qarşıdurma yaratmaq istəklərini xatırlayaq. Elə həmin illərdə "Sadval”ın şimalda, Talış-Muğan Respublikasının ideoloqlarının cənubda, lap elə Gəncənin özündə ayrı-ayrı hakimiyyət hərislərinin fəaliyyəti Azərbaycanı az qala süqut həddinə gətirib çıxarmışdı və bunun nəticəsi o oldu ki, Vətənim Laçın rayonu və digər rayonlar ermənilər tərəfindən işğal edildi, soydaşlarımız məcburi köçkün həyatına məhkum oldular. Belə bir vaxtda Ümummilli liderimizin xalqın tələbi ilə ikinci dəfə hakimiyyətə dönüşü Azərbaycanı xilas etdi. Kimin kim olduğunu çox gözəl bilən Ulu Öndərimiz böyük maraqların toqquşduğu Azərbaycanda sabitliyi, əmin-amanlığı, onunla birlikdə həm də demokratiyanı bərpa etdi. İnsanlar təkcə evlərində deyil, həm də yaşadıqları şəhərdə, onun parkında, bulvarında, küçəsində öz təhlükəsizliklərinin şahidlərinə çevrildilər. Gördülər ki, məmləkətdə rahat yaşamaq, öz konstitusion hüquqlarından istifadə etmək mümkündür. Bunun üçün öncə qanunlara sayğı göstərmək, dövlətini, vətənini sevmək və vətəndaş kimi üzərinə düşən missiyanı yerinə yetirmək lazımdır.

Gəncədə baş verən hadisə hər kəs kimi mənim də diqqətimi çəkdi. Və düşündüm ki, bu məsələyə öz vətəndaş mövqeyimi bildirmək mənim də haqqımdır. Ona görə də baş verən hadisəni, onunla bağlı yayılan informasiyaları təkrar-təkrar gözdən keçirəndən sonra birmənalı şəkildə anladım ki, bu sifarişli cinayətin, bu məqsədli terrorun arxasında Azərbaycanın imicinə zərbə vurmaq dayanır. Çünki hər bir halda kimisə qətlə yetirmək, güllələmək yolverilməzdi.

İnsanın ən ali varlıq olması, hətta müqəddəs kitabımızda kimisə öldürmək hüququnun insana verilməməsinin özü də dediklərimizi bir daha sübut edir. Axı biz quldarlıq və yaxud ictimai icma dövründə yaşamırıq. Bu gün dünya sivilizasiyasının, demokratiyasının, Avropa dəyərlərinin ən müsbət çalarları Azərbaycanda kifayət qədər oturuşub. Günahkarların cəzalandırılması üçün hüquq-mühafizə orqanları, məhkəmə sistemi var. Kimsə kimdənsə narazılığını silahla, öldürməklə, terror etməklə aradan qaldırmaq hüququna malik deyil. Deməli, bu faktın özü də göstərir ki, Gəncədə terror törədən Yunis Səfərov əslində öz qaranlıq keçmişinin mahiyyətini gizlətməyə, həyata keçirdiyi terrorun əsl simasını gizlətməyə çalışır.

Araşdırmalar göstərir ki, Gəncə icra hakimiyyətinin başçısı Elmar Vəliyevə sui-qəsd edən Yunis Səfərovun ata nənəsi Yuxarı Daşkəsən qəsəbəsində yaşayan erməni əsilli Svetlana Akopovna Karapetyandı. Onun anası bir neçə dəfə ayrı-ayrı izdivaclara imza atıb. Onların arasında həmin dörd kişidən biri erməni olubdu. Bu gün Azərbaycan əleyhinə böyük kampaniya aparan və Azərbaycan dilində danışmaqdan imtina edən Zabil Məhərrəmov da Yerevanda sığınacaq tapıb. Və oradan yayımladığı verilişində bayrağın üzərinə terrorçunun, yəni icra başçısına güllə atan Yunis Səfərovun şəklini yerləşdirib. Amma insanları etiraza, itaətsizliyə çağıran Zabil və onun kimi ünsürlər unudurlar ki, bu gün Azərbaycan dünya xəritəsində, dünya ölkələri arasında özünü təsdiq etmiş, öz inkişaf səviyyəsilə Avropa ölkələri ilə yanaşı dayanan bir məmləkətdir. Bu məmləkətin hər bir guşəsində quruculuq, abadlıq işləri sürətlə aparılır. İnsanların normal həyatı təmin olunur. Təkcə Elmar Vəliyevin şəhərə çevirdiyi Yevlaxı göz önünə gətirsək, bu reallıqdan heç kim qaça bilməz. Bir zamanlar unudulmuş, sönük bir yaşayış məntəqəsi təsiri bağışlayan Yevlax şəhəri məhz Elmar Vəliyevin icra başçısı olduğu dönəmdə yenidən ilk nöqtədən başladı qurulmağa. Kür çayı boyunca uzanan istirahət parkının mənzərəsi, buradakı səliqə-səhman bu şəhərin qonağı olan heç kəsin diqqətindən yayına bilməz. Şəxsən bir vətəndaş kimi mən ölkədən kənarda istirahətdə olarkən orada Elmar Vəliyevlə qarşılaşdım. Onun istirahət etdiyi şəhərin qeyri-adi mənzərələri ilə maraqlanması, oradan çoxlu gül-çiçək toxumları, ağac tingləri alıb Yevlaxa göndərməsi bu günə qədər mənim yadımda qalır. Sonralar Yevlaxda olarkən həmin çiçəklərin, ağacların Yevlaxı bəzədiyinin şahidi oldum. Son dərəcə işgüzar, ölkə prezidentinə, xalqına sədaqətli bir məmur olan Elmar Vəliyev cənab prezidentimiz İlham Əliyevin bütün tələb və tapşırıqlarını çox böyük diqqət və bacarıqla yerinə yetirib. Onun Gəncə şəhərində Heydər Əliyev parkını, ümumi mənzərəsini, küçə və yollarını, tikinti-quruculuq işlərini necə keyfiyyətlə, milli arxitekturaya uyğun bir şəkildə reallaşdırdığını hamı görüb və bu gün də görür. Təsadüfi deyil ki, Gəncənin bugünkü mənzərəsində ölkə başçısının bu şəhər üçün qarşıya qoyduğu vəzifələri Elmar Vəliyev çox böyük canıyananlıqla reallaşdırıb.

Bir gerçəklik də var. Ölkə prezidenti bütün bölgələrə, bütün icra hakimiyyətlərinə diqqət göstərir. Amma hər kəs bu diqqətdən öz bacardığı kimi istifadə edir. Məhz Elmar Vəliyev də Ulu Öndərimizin layiqli varisinin tələblərinə layiq bir şəkildə Gəncədə fəaliyyət göstərib.

Çox təəssüf ki, Şeyx Nizaminin, Cavad xanın ruhu yaşayan bu şəhərdə bu cür bir terrora imza atıldı, iki nəfər polis zabitimiz şəhid oldu. Rus generalı, erməni əsilli Sisyanovun qarşısında öz sərkərdə məharətilə təkcə Sisyanovu yox, bütövlükdə rus imperiyasını silkələyən Cavad xanın qəhrəmanlığı qürur yerimizdir. Bununla o, Azərbaycan xalqını, bu məqamda isə gəncəlilərin rəşadətini göstərdi. Bu gerçəyin üzərinə ləkə salmağa çalışan Yunis Səfərov kimi və onu dəstəkləyən ünsürlərin istəkləri gözlərində qalacaq. Çünki Azərbaycan xalqı, onun iqtidarı vahiddi və xalqla iqtidarın birliyini heç kim sarsıda bilməz. Sadəcə olaraq məni bir vətəndaş kimi düşündürən odur ki, məsələnin mahiyyəti bir kənarda qalır, insanları yalnış informasiyalarla qıcıqlandırmağa, müəyyən narazılıqlar yaratmağa cəhd edirlər. Amma onlar da unudur ki, haqq-ədalət həmişə qalib gəlib. Öz müstəqilliyinə ikinci dəfə qovuşmuş Azərbaycanın memarı Ulu Öndərimiz bu dövlətin yolunu müəyyən edib, onu etibarlı əllərə tapşırıbdı. Bizlər də bu ölkənin həm əsgəriyik, həm də onun inkişafına, tərəqqisinə xidmət edən vətəndaşlarıyıq. Azərbaycan Milli Ordusunun yaranmasının 100 illiyini təntənəli şəkildə qeyd etməyimiz, keçrilən möhtəşəm hərbi parad Azərbaycan dövlətinə düşmən kəsilmiş xarici qüvvələri və onları içərimizdə olan tör-töküntülərini məyyus etdi. Dövləti, dövlətçiliyi olmayan millətin vətəni ola bilməz. Ona görə də vətənə, anaya olan sevgi dövlətçiliyə olan sevgi ilə eyni olmalıdır. Odur ki Cavad xanın vətəni olan Gəncə şəhərində Dövlətimizə, Dövlətçiliyimizə xəyanət cinayyətində əli olan hər bir şəxs öz layiq olduqları cəzanı almalıdırlar ki, Azərbaycan dövlətçiliyinə kəm baxmaq istəyənlərin hər birinə ibrət dərsi olsun.

Ramiz CƏBRAYILOV

Laçın rayonundan məcburi köçkün,

Qarabağ müharibə veteranı