İstifadəsi qadağandır, lakin satışı var - Siqnal adı ilə müxtəlif səs çıxaran qurğular satılır (VİDEO)

Sosial şəbəkələrdə və elan saytlarında bəzi satışı qadağan olunmuş avtomobil aksesuarları satılır. Onlardan biri də çoxsəsli avtomobil siqnalıdır.

Sürücülərə təklif olunan bu qurğuya kifayət qədər maraq da var.

Sürücülər qurğunu pult və ya avtomobilin salonuna yerləşdirilmiş panel vasitəsilə idarə edərək istədikləri səsi seçib, siqnal kimi istifadə edirlər.

Baş Dövlət Yol Polisi İdarəsinin inspektoru Toğrul Nəsirli bildirib ki, həmin qurğulardan istifadə edən sürücülər inzibati məsuliyyətə cəlb olunurlar.

Onun sözlərinə görə, yollarda bu səs siqnallarından istifadə edən sürücülər var. Lakin onlar həmin siqnal qurğularını müxtəlif üsullarla gizlətməyə çalışsalar da, dövlət yol polisi əməkdaşları tərəfindən aşkarlanaraq müsadirə olunur. 

Qeyd edək ki, maşınlara quraşdırılan əcaib, yüksək səs siqnalları insanların istirahət hüququnu pozur, onların səhhətinə, psixoloji durumuna mənfi təsir göstərir. Buna görə də İnzibati Xətalar Məcəlləsinin 521-ci maddəsinə əsasən - fiziki şəxslər yüz əlli manatdan iki yüz manatadək, vəzifəli şəxslər iki min manatdan iki min beş yüz manatadək məbləğdə cərimə edilir. 

Xezerxeber.az mövzu ilə bağlı daha ətraflı videomaterialı təqdim edir.