Erkən evliliyə görə nəzərdə tutulan cəzalar - Vəkil açıqladı

Vəkil Qaynarinfo-ya açıqlamasında bildirib ki, 16 yaşına çatmayan qızın, yaxud da oğlanın erkən evliliyə cəlb olunmasında iştirak edən şəxslər iki ildən dörd ilədək azadlıqdan məhrum edilə bilər:

"Cinayət Məcəlləsinin 176-1. maddəsi - nikaha və ya erkən evliliyə daxil olmağa məcbur etmə, maddə:176-1.1. nikaha daxil olmağa məcbur etmə hallarında iki min manatdan üç min manatadək miqdarda cərimə və ya iki ilədək müddətə azadlıqdan məhrum etmə ilə cəzalandırılır. 

Maddə:176-1.2. nikah yaşına çatmayan şəxsi erkən evliliyə daxil olmağa məcbur etmə hallarında üç min manatdan dörd min manatadək miqdarda cərimə və ya dörd ilədək müddətə azadlıqdan məhrum etmə ilə cəzalandırılır. Bu Məcəllənin 176-1 və 176-2-ci maddələrində "erkən evlilik” dedikdə yetkinlik yaşına çatmayan şəxslə nikah bağlamadan ailə qurmaq məqsədilə yaradılan ittifaq başa düşülür.

 

Maddə: 176-2.- on altı yaşına çatmayan şəxsin erkən evliliyinin təşkili... On altı yaşına çatmayan şəxsin erkən evliliyinin həmin şəxsin və ya erkən evliliyə daxil olan digər şəxsin valideynləri və ya onları tərbiyə etmək vəzifəsi daşıyan şəxslər və ya erkən evliliyə daxil olan yetkinlik yaşına çatmış şəxs tərəfindən təşkil edilməsi halları zamanı iki min manatdan üç min manatadək miqdarda cərimə və ya iki ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılır. Bu maddədə nəzərdə tutulmuş cinayətə görə məsuliyyət erkən evliliyə daxil olan yetkinlik yaşına çatmış şəxsə münasibətdə həmin şəxslə zərərçəkmiş şəxsin yaş fərqi beş ildən çox olduqda yaranır”.

Qeyd edək ki, Ailə, Qadın və Uşaq Problemləri üzrə Dövlət Komitəsi qızlarını 16 yaşda nişanlayan analarla bağlı qanunvericiliyin sərtləşdirildiyini bildirib. Komitə qeyd edib ki, 16 yaşına çatmayan şəxslərin erkən evliliyini təşkil etmək, bu məqsədlə nişan, toy və dini nikah mərasimləri keçirmək, həmçinin bu sövdələşmələrdə iştirak etmək cinayət və inzibati məsuliyyət yaradır.