Konsaltinq şirkəti “get experts” namizədlərin müraciətlərinin təhlili platforması “Cun” və müsahibələrin keçirilməsi xidməti “Sobeso” ilə birgə araşdırma aparıb. Məlum olub ki, şirkətlərin 49%-i işə qəbul zamanı artıq süni intellektdən (Al) istifadə edir, 21%-i isə yaxın vaxtlarda bunu tətbiq etməyi planlaşdırır. Beləliklə, işəgötürənlərin 70%-i ya süni intellektdən istifadə edir, ya da bunu etməyə hazırlaşır.
Qaynarinfo xəbər verir ki, işəgötürənlərin sözlərinə görə, işə qəbul prosesində ən çox vaxt “soyuq” axtarışa (67%), namizədlərin müraciətlərinin təhlilinə (53%) və namizədlərin qiymətləndirilməsinə (39%) sərf olunur. Müsahibələrin koordinasiyası (24%) və vakansiya profilinin hazırlanması (11%) da kifayət qədər vaxt tələb edir.
Artıq Al-dan istifadə edən şirkətlər arasında bu texnologiyadan ən çox vakansiyaların təsvirlərinin hazırlanması (64%), müsahibələrin transkripsiyası və təhlili (36%), fərdiləşdirilmiş məktubların hazırlanması (31%), ilkin seçim (29%) və namizədlərin sıralanması (29%) üçün istifadə olunur.
İşəgötürənlərin 55%-i Şİ tətbiq edildikdən sonra rutin işlərin həcminin azaldığını, 36%-i işə qəbul üzrə mütəxəssislərin yükünün azaldığını, 20%-i isə vakansiyaların bağlanması müddətinin qısaldığını bildirib. Şirkətlərin 68%-i işə qəbulun Al vasitəsilə avtomatlaşdırılmasına ildə 500 min rubldan az, 18%-i 500 min-1 milyon rubl, 5%-i isə 2 milyon rubldan çox vəsait xərcləyir.
Bununla belə, bütün işəgötürənlər alqoritmlərə etibar etməyə hazır deyil. Al-dan imtina edən və ya onu tətbiq etməyi planlaşdırmayan şirkətlərin 46%-i işə qəbul prosesində insan amilinin həlledici olduğunu düşünür. 41% qərəzlilik ehtimalından narahat olduğu üçün alqoritmlərə etibar etmir, 32% müvafiq ekspertizanın olmadığını, 29% isə investisiyaların geri qaytarılmasına şübhə etdiyini bildirir. Digər səbəblər arasında büdcənin məhdudluğu (29%), 152-FZ tələbləri və məlumat sızması riski (25%) göstərilib.
Namizədlərin işə qəbul prosesində Al-dan istifadəsinin qarşısını almaq üçün işəgötürənlər ən çox canlı müsahibələrdən (56%), real vaxt rejimində tapşırıqlardan (33%) istifadə edir və müsahibə zamanı cavabların üslubunu CV ilə müqayisə edirlər (26%). Şirkətlərin 23%-i isə bununla mübarizə aparmır və Al-dan istifadə bacarığını yeni bir vərdiş hesab edir.
Namizədlərin 43%-i müşayiət məktublarının hazırlanması və CV-lərin redaktəsi, 30%-i müsahibəyə hazırlıq, 21%-i isə əmək bazarının araşdırılması üçün Al-dan istifadə edib. Bununla yanaşı, namizədlərin 44%-i seçim prosesində Al-ın iştirak etdiyini öyrəndikdə vakansiyaya marağını itirir, 9%-i üçün isə bu, işə qəbul prosesində iştirakdan imtina etmək üçün səbəb olur.
Namizədlərin 76%-i Al-ın onların təcrübə və ya bacarıqlarını səhv qiymətləndirə biləcəyindən narahatdır. 46% alqoritmin qərarından şikayət etmək imkanının olmamasından, 45% prosesdə “insani yanaşmanın” çatışmamasından, 30% isə şəxsi məlumatların sızması riskindən narahatdır. Namizədlərin 70%-i seçim prosesinin hansı mərhələsində onlarla Al-ın qarşılıqlı əlaqədə olduğunu əvvəlcədən bilmək istəyir.
Paşa Məmmədli
