Qaynarinfo-nun məlumatına görə, o, fransız məşqçi tərəfindən üç il boyunca məruz qaldığı təcavüzdən, yaşadığı çətinliklərdən və bütün bunların onun çıxışına necə təsir etməsindən danışıb.

Selime Ərəb Qadın Tennis Assosiasiyasının ən yaxşı 100 oyunçusu sırasına qoşulub və tarixdə bu uğuru qazanan ilk ərəb idmançı olub. Tunisli tennisçi fransalı məşqçisinin 12 yaşından başlayaraq ona necə təcavüz etməsindən danışıb. Sfar idmana böyük həvəsi olduğunu və məşqçisinin də fürsət tapan kimi bundan yararlandığını bildirib. Selimenin 30 il sonra bu təcavüz hadisəsini açıqlaması hər kəsin marağına səbəb olub. Sfarın hazırda həbsxanada yatan keçmiş məşqçisi əvvəllər də oxşar işlərlə məşğul olub. Bu yaxınlarda ictimaiyyəti və medianın diqqət mərkəzində olan hadisə gənc qızın tennisə olan həvəsi ətrafında cərəyan edir. Bu ehtiras sonralar acı qarşıdurmaya və məğlubiyyətə çevrildi. Sfarın sözlərinə görə, o, sonrakı illərdə özünə inamını və hətta təhlükəsizliyini itirib. Yaşananların bütün həyatına təsir etdiyini söyləyib. O, məsələni indi gündəmə gətirməsinin səbəbi kimi, gələcək nəsil uşaq və qadınlarda məsuliyyət hissi yaratmaq istəyi ilə izah edib.

Sfar təyyarənin gecə saatlarında Tunisə çatmasından dərhal sonra başlayan hadisələrin təfərrüatlarını bu şəkildə açıqlayıb:

"Regis dünyanın ən yaxşı məşqçilərindən biridir. Sakit, təbii bir insan kimi görünürdü, öz işinin mütəxəssisi idi. Oyunçular həmişə onun diqqətini tennis kortunda çəkməyə çalışırdılar. O, ağıllı və manipulyasiya edən idi. İlk fürsətdən çəkinmədən yararlandı. Təyyarə Tunisə gecə çatdıqdan sonra o, məni aparmağa gəldi və maşını magistral yolun kənarında saxladı. Mənə toxunmağa başlayanda donub qaldım, çünki o ana qədər nə baş verdiyini bilmirdim. Mənə təkcə ona məşqçi kimi hörmət etməli olduğumu söylədilər. Çünki o, məni çempion edəcək məşqçi idi. Donub qaldığımı görəndə yenidən maşını sürməyə başladı. Gecə onun evinə yollandıq və bu dəfə daha da irəli getdi. Reaksiya verə bilmədim, şok yaşadım və o, bunu yenidən edə biləcəyini anladı. Təəssüf ki, bu üç il davam etdi”.

Sfar yaşadıqlarını dərk etdiyi vaxtları ən çətin, bu dəhşətli travmanın bütün həyatına nə dərəcədə təsir etdiyini anladığı yaş kimi təsvir edib:

"Vaxtı geri qaytara bilsəydim, mənə ilk toxunan anda onu ciddi şəkildə dayandırardım. Qətiyyətli davranardım, hətta lazım gələrsə, fiziki yaxud şifahi zorakılığa da əl atardım və ya bunu yüksək səslə bildirməklə hədələyərdim, amma donmazdım. Karyeramın kritik mərhələsi Dubayda keçirilən turnirin finalında dünyanın ən məşhur idmançılarından biri olan rusiyalı tennisçi Anna Kurnikovaya qarşı oynadığım an idi. Şübhəsiz, bunlar 12 yaşım olanda keçirdiyim hisslər idi və mənim üçün matçın ən vacib olan anında özümü iflic kimi hiss etdim. Bu matç əla idi və qələbə məni nəinki ən yaxşı 50 tennisçi arasında yüksək sıralamaya aparacaq, həm də mənə xüsusilə ərəb dünyasında böyük prestij, hörmət və şöhrət qazandıracaqdı. Çünki tennisdə Kurnikovaya qalib gəlmək dünya çempionatında Messini məğlub etmək kimi idi. Üçüncü setdə qalib gəldim və birdən əlimdəki raketkanı 300 kq kimi hiss etdim və donub qaldım. Özümə nifrət etdim. 12 yaşımda zorakılığa məruz qaldığım üçün özümü zəif, qorxulu və çarəsiz hiss edirdim. Mən hədsiz dərəcədə günahkarlıq və utanc hissi keçirirdim. Daha sonra mətbuatla üz-üzə gəlməkdən imtina etdim, cərimələndim və Dubaydakı ailəmlə görüşmədən növbəti reyslə getdim. Çox utandım və qəzəbləndim. Bu, karyeramda hiss etdiyim ən tənha və çarəsiz an idi. Bu, bir neçə ay məni təqib edən kabus oldu. Mətbuata açıqlamalarında ailəm də daxil olmaqla hamı mənə psixi cəhətdən kifayət qədər güclü olmadığımı deyirdilər”.

Hazırda 40 yaşı olan Sfar uşaqlara psixoloji dəstək məqsədilə proqram yaratdığını da deyib.

"Qadınları və uşaqları gücləndirmək üçün bir proqram yaratdım. Proqram uşaqlara öz hisslərini və ya fərqliliklərini ifadə etməyə icazə verilməməsinin səbəbini araşdırır. Proqram uşaqlara tez-tez deyildiyi kimi, gənclərə qorxu, qəzəb, narahatlıq və üsyan kimi qaranlıq duyğuları ifadə etmək bacarığını vermək məqsədi daşıyır. Uşaqlar böyüklərə qarşı üsyan edəndə qəzəblərini və ya kədərlərini göstərirlər və ya kobud davranırlar. Proqram, uşağın rədd edilmək və ya alçaldılma qorxusu olmadan özünü təsdiqləmək və istədiyini və istəmədiyini ifadə etmək üçün kifayət qədər əmin olmasını təmin edir. O, həmçinin uşağa avtoritet fiqurlardan qorxmadan onların öhdəsindən gəlməyə kömək edir. Hansı ki, sui-istifadə hallarının 80 faizi ətraf mühitdəki yetkinlərdən gəlir”.