Millət vəkili: “Sentyabrda rayonlara gediş-gəliş yasağı qaldırılmalıdır”

Qaynarinfo xəbər verir ki, bunu millət vəkili Vüqar Bayramov deyib. Onun fikrincə, əslində, yoluxma sayı ilə bağlı son həftələrin pozitiv dinamikası rayonlara gediş-gəlişə icazə verilməsinə zəmin yaradır:

"Bizim binada yaşayan paytaxt sakinlərindən biri, demək olar, hər gün məndən rayonlara gediş-gəlişə nə zaman icazə veriləcəyini soruşur. Aylardır ki, o nəvəsini görmək istəyir, amma karantin səbəbindən paytaxtı tərk edə bilmir. Əslində, yoluxma sayı ilə bağlı son həftələrin pozitiv dinamikası rayonlara gediş-gəlişə icaizə verilməsinə zəmin yaradır. Artıq rayonlar qırmızı zonada deyil, paytaxtda da yoluxma sayı optimallaşır. Əlbəttə, bu da heç bir halda bizdə arxayınçılıq yaratmamalıdır və vaksin tapılana və pandemiya lokallaşanadək qaydalara ciddi əməl edilməsinə ehtiyac var. Bununla yanaşı, paytaxtdan rayonlara səfərlər həmçinin bölgələrin sosial-iqtisadi inkişafı baxımdan da vacibdir”.

 

Vüqar Bayramov bildirib ki, son illər bölgələrin real gəlirlərində turizm gəlirlərinin payı artmaqdadır və daxili turizmin inkişafı üçün də səfər məhdudiyyətinin aradan qaldırılmasına ehiyac var:

"Bu baxımdan, sentyabrda rayonlara gediş-gəliş ilə bağlı icaizənin aradan qaldırılması məqsədəuyğundur. Okyabrdan ali məktəblərdə təhsilin də mərhələli şəkildə başlanacağını nəzərə alsaq, icazənin götürülməsi daha da aktuallaşıb”.