Meyvə şirəsi vitaminlər və faydalı bitki mənşəli birləşmələrin mənbəyi ola bilər. Bununla belə, o, bütöv meyvələri tam əvəz edə bilməz. Mütəxəssislər meyvə şirəsinin müntəzəm istehlakının bağırsaqlara, mikrobioma və ümumi sağlamlığa necə təsir göstərə biləcəyini izah ediblər.

Qaynarinfo xəbər verir ki, bu barədə "Verywell Health” yazır.

Qidalanma bağırsaqlarda təbii şəkildə yaşayan mikroorqanizmlərin – bağırsaq mikrobiomunun tərkibinə birbaşa təsir göstərir. Faydalı və daha az faydalı bakteriyaların, eləcə də digər mikroorqanizmlərin nisbəti qidalanma vərdişlərindən asılı olaraq dəyişə bilər.

Meyvə şirələrinin tərkibində adətən yüksək miqdarda təbii şəkər, əsasən də fruktoza olur. Bəzi şirələr və onların qarışıqları əlavə şəkər də ehtiva edə bilər.

Məqalədə qeyd olunur ki, şəkərlə zəngin qidalanma bağırsaq mikrobiomunun balansını poza və disbioz adlanan vəziyyətin yaranmasına səbəb ola bilər.

Diş çürüməsi riski

Sadə karbohidratların, xüsusilə də şəkərin həddindən artıq qəbulu diş çürüməsi riskini artırır. Meyvə şirələrindəki şəkər və turşular zamanla diş minasını zədələyə bilər. Diş minasının zəifləməsi isə kariyesin yaranma ehtimalını yüksəldir.

Mütəxəssislər bu riski azaltmaq üçün aşağıdakı tövsiyələri verirlər:

* Şirə içdikdən dərhal sonra dişləri fırçalamayın.

* Şirəni qısa müddətdə için ki, dişlərlə təmas müddəti azalsın.

* Şirədən sonra ağzınızı adi su ilə yaxalayın.

* Mümkünsə, şirəni borucuq vasitəsilə için.

2-ci tip diabet riski

Bir meta-analizdə alimlər qidada şəkər miqdarı ilə 2-ci tip diabet riski arasındakı əlaqəni araşdırıblar. Nəticələr göstərib ki, hər əlavə meyvə şirəsi porsiyası xəstəliyin yaranma riskini təxminən 5 faiz artırır.

Tədqiqat müəllifləri vurğulayırlar ki, meyvə şirəsi bütöv meyvələrin tam alternativi deyil. O, müəyyən faydalı maddələr ehtiva etsə də, təzə meyvələrlə müqayisədə daha çox şəkər və demək olar ki, heç bir qida lifi ehtiva etmir.

Məhz qida lifi şəkərin sorulmasını ləngidir, qanda qlükoza səviyyəsinin tənzimlənməsinə kömək edir və onun kəskin yüksəlməsinin qarşısını alır.

Kalori qəbulunun artması

Gündəlik rasiona meyvə şirəsinin əlavə olunması qəbul edilən ümumi kalori miqdarını artıra bilər. Bununla belə, tədqiqatlar bunun bədən çəkisinə təsiri ilə bağlı vahid nəticə ortaya qoymur. Bəzi meta-analizlər 100 faiz meyvə şirəsinin çəki artımı ilə əlaqəli olmadığını göstərsə də, digər araşdırmalar fərqli nəticələr ortaya qoyub.

Araşdırmalar göstərir ki, 100 faiz meyvə şirəsi içən insanlar adətən meyvə istehlakını azaltmırlar. Lakin bütöv meyvələrin əsas üstünlüyü onların qida lifi və digər faydalı maddələrlə zəngin olmasıdır.

Qida lifi bağırsaq sağlamlığı üçün çoxsaylı müsbət təsirlərə malikdir. Buna görə də mütəxəssislər şirəni meyvə ilə əvəz etməməyi, əksinə bütöv meyvələrə üstünlük verməyi tövsiyə edirlər.

Faydalı ola biləcək meyvə şirələri

Məqalədə qeyd olunur ki, bəzi meyvə şirələri ölçülü istehlak edildikdə sağlamlığa fayda verə bilər.

Araşdırmalara görə:

* Turş albalı şirəsi yorğunluğun azalmasına kömək edə bilər.

* Zoğal şirəsi qanda qlükoza səviyyəsinə və iltihab göstəricilərinə müsbət təsir göstərə bilər.

* Qaragilə şirəsindəki antosianinlər iltihabın azalmasına və idrak funksiyalarının dəstəklənməsinə kömək edə bilər.

Şirələrin istehlakı ilə bağlı digər məlumatlar

Daha əvvəl diyetoloqlar nar şirəsini içmək üçün ideal vaxtın olub-olmadığını izah ediblər. Onların sözlərinə görə, daha yaxşı həzm və əlavə enerji əldə etmək üçün nar şirəsini səhər saatlarında və ya günün ikinci yarısının əvvəlində içmək məqsədəuyğun ola bilər.

Həkimlər həmçinin arterial təzyiqin aşağı salınmasına kömək edə bilən şirənin çuğundur şirəsi olduğunu bildiriblər. Araşdırmalara əsasən, yaşlı insanlarda çuğundur şirəsi qəbulundan sonra qan təzyiqinin aşağı düşdüyü müşahidə olunub.

Aydın