Qaynarinfo xarici mediaya istinadən xəbər verir ki, sahəsinə görə cırtdan olsa da, Avropanın ən varlı və ən sabit ölkələrindən birinə çevrilməyi bacarıb.

Bəs, Lixtenşteyn niyə müstəqil dövlətdir, necə yaranıb, turistləri nə ilə heyran edir və onu unikal edən xüsusiyyətlər hansılardır?

Knyazlıq Lixtenşteyn Avropanın mərkəzində yerləşən kiçik dövlətdir:

* Paytaxtı Vaduçdur;

* Əhalisi təxminən 39 min nəfərdir;

* Sahəsi 160 kv. km-dən bir qədər çoxdur;

* Qərbdə və cənubda İsveçrə, şərqdə Avstriya ilə sərhəddir, dənizə çıxışı yoxdur;

* Rəsmi dili alman, valyutası isə İsveçrə frankıdır.

Knyazlıq adını Avstriyadakı Lixtenştayn qəsrinin adını daşıyan hakim sülalədən alıb. Lixtenşteyn sözü "parlaq daş" deməkdir.

Hazırkı Lixtenşteyn ərazisində əvvəlcə Şellenberq və Vaduç feodal əraziləri mövcud olub. 1507-ci ildə Vaduça suverenlik statusu verilib, daha sonra bu torpaqlar Lixtenştayn ailəsinə keçib. 1719-cu ildə Şellenberq və Vaduç birləşdirilərək Lixtenşteyn knyazlığı yaradılıb. 1806-cı ildə o, Reyn İttifaqına daxil olub, 1866-cı ildə isə knyaz II Yohann dövründə tam müstəqillik əldə edib.

Lixtenşteyn nə ilə məşhurdur? - Ölkə haqqında 10 maraqlı fakt

Lixtenşteyn kiçik olsa da, çoxsaylı özünəməxsus xüsusiyyətlərə malikdir. Ən diqqətçəkənlərini təqdim edirik:

1. Lixtenşteyn tamamilə Alp dağlarında yerləşir. Ölkə mənzərəli dağlıq relyefə, özünəməxsus iqlimə və aktiv istirahət üçün əlverişli şəraitə malikdir.

2. Lixtenşteyndə nə dəmir yolu, nə də aeroport var – ora yalnız avtomobil və ya avtobusla getmək mümkündür. Ən yaxın hava limanları İsveçrə və Avstriyadadır. Velosiped yerli əhali üçün ən məşhur nəqliyyat vasitəsidir.

3. Dünyanın ən yüksək adambaşına düşən ÜDM göstəricilərindən birinə malikdir. Səbəb – əhalinin azlığı, inkişaf etmiş iqtisadiyyat, biznes üçün əlverişli şərait və aşağı vergilər. Bu faktorlar Lixtenşteyni Avropanın ən varlı ölkəsinə çevirib.

4. Lixtenşteyndə demək olar ki, cinayət yoxdur. Bir çoxları qapılarını belə bağlamır, polis əməkdaşlarının sayı isə yüzdən azdır. 20 nəfər üçün nəzərdə tutulmuş həbsxanada adətən 10-dan çox məhbus olmur. Yemək onlar üçün restoranlardan gətirilir, çünki ayrıca aşpaz saxlamaq sərfəli deyil.

5. Ölkədə şirkətlərin sayı sakinlərin sayını üstələyir. Burada maliyyə xidmətlərindən tutmuş istehsala qədər müxtəlif sahələr üzrə müəssisələr fəaliyyət göstərir.

6. Lixtenşteyn çox sabit və güclü iqtisadiyyata malikdir və demək olar ki, xarici borcu yoxdur. Bu, bank sektorunun inkişafı, işsizliyin azlığı və biznesə yaradılan əlverişli şəraitlə bağlıdır.

7. Lixtenşteynin ordusu yoxdur. Knyazlıq neytrallıq siyasətinə sadiqdir və müdafiə məsələlərində İsveçrəyə güvənir – bu, aralarında imzalanmış razılaşmanın nəticəsidir. Son dəfə 1866-cı ildə, Avstriya–Prussiya müharibəsi zamanı ordu göndərilib. 80 əsgər döyüş görmədən qayıdıb, lakin geri dönənlərin sayı 81 olub – buna səbəb kimi ya avstriyalı əlaqələndirici zabitin, ya da italiyalı bir dezertirin onlara qoşulması göstərilir.

8. Lixtenşteyni bir günlüyə bütöv olaraq icarəyə götürmək olar. Qiymət – 70 000 dollar. Bu məbləğə Vaduç üzrə ekskursiya, qədim qəsrlərin ziyarəti, kolleksiya şərablarının dadılması, Alp turları və atəşfəşanlıq daxildir.

9. Lixtenşteyndə ailələr bir vergi subyekti kimi vergiyə cəlb olunur. Bu sistem ailə dəyərlərinin möhkəmlənməsini dəstəkləyir və demoqrafik problemlərin həllinə yardımçı ola bilər.

10. Ölkədə fermerlərin qeyri-adi ənənəsi var – onlar ölmüş inəklərin xatirəsinə nekroloq dərc edirlər. Bu, heyvanlara hörmət və kənd təsərrüfatının əhəmiyyətinə vurğu kimi qəbul edilir.

Aydın