"Putin Trampı oyuna salır" - Politoloq

Bunu Qaynarinfo-ya açıqlamasında politoloq Elşad Həsənov ABŞ prezidenti Donald Trampın rusiyalı həmkarı Vladimir Putinə Ukrayna müharibəsini dayandırmaq üçün verdiyi növbəti iki həftəlik möhlətin sentyabrın 1-də bitməsi fonunda hansı addımlar ata biləcəyini şərh edərkən deyib. 

"Düşünürəm ki, növbəti möhlət limitinin bitməsilə Tramp yenidən Putinlə təcili danışıqlar aparmaq niyyətini gündəmə gətirəcək. Vaxtı növbəti dəfə uzatmaqla Moskvaya qarşı konkret ciddi tədbirlər görməyəcək. Bu isə Konqres və Senatda narazılığa səbəb olacaq. Nəticədə isə müharibə hələ bir qədər də uzanacaq", deyə politoloq bildirib.

Ekspert qeyd edib ki, Tramp hər dəfə Putinə güzəştə gedir və verdiyi sözə əməl etmir:

"İlk dəfə verdiyi ultimatum avqustun 8-də başa çatsa da, Tramp Putinə qarşı heç nə etmədi. Əksinə, avqustun 15-də Alyaskada onlar arasında görüş oldu. Amma bu görüşün də heç bir nəticəsi olmadı. Nə müharibə dayandı, nə də Zelenski-Putin görüşü baş tutdu".

 

Həmsöhbətimiz düşünür ki, Putin müharibəni uzatmaq üçün Trampı oyuna salır:

"Gələn həftənin ilk günü Trampın verdiyi iki həftəlik növbəti möhlət də başa çatır. Ancaq görünən odur ki, Putin hələ də Zelenski ilə görüşdən qaçır. Eyni zamanda, Rusiya Kiyevə qarşı əvvəlki tələblərini irəli sürməkdə davam edir. Lakin Ukrayna da Moskvanın bu tələblərini rədd edir. Ukrayna Konstitusiyası prezident və parlamentə öz torpaqlarını digər ölkələrə vermək səlahiyyəti verməyib. Putin bunları bildiyindən müharibəni uzadır və Trampı oyuna salır. Trampın ABŞ daxilində nüfuzu da aşağı düşməkdədir. Son rəy sorğularına görə, əhalinin cəmi 37 faizi onu dəstəkləyib. Bu nəticənin yaranmasında sözsüz ki, Trampın Kiyevə hərtərəfli dəstək verməməsi və Putinin "çaldığı mahnıya” oynaması da öz sözünü deyib".

Qeyd edək ki, üzümüzə gələn həftənin birinci günü ABŞ prezidenti Donald Trampın Rusiyaya Ukraynadakı müharibəni dayandırmaq üçün verdiyi növbəti iki həftəlik möhlət başa çatır. Buna baxmayaraq, Rusiya prezidenti hələ də həm Ukrayna prezidenti Volodimir Zelenski ilə danışıqlara getməkdən qaçır, həm də münaqişəyə son vermək istəmədiyini ortaya qoyur. Belə olan halda sentyabrın 1-dən sonra əsas məsələ Tramp bu dəfə hansı addımlar atacağı məsələsi olacaq.