Ruzbeh Məmməd

Blogger
Yazılar
2
Şəkil çəkən qızların şeirə gəlməsi

Şəkil çəkən qızların şeirə gəlməsi

Ruzbeh Məmməd

Son vaxtlar insan izdihamını Damlanın konsertində görmüşdük. Səhvimi düzədim: mətbuatdan izləmişdik...

Lakin bu dəfə fərqli oldu. Ölkənin məşhur şairinin başına yığışdılar.

Başqa şəhərimiz olmadığı üçün, yenə bu şəhərdə üz-üzə gəlib xeyli şeirdən danışıldı, gənc qızların güllə kimi yağan xoş sözlərinin sədası altında imza mərasimi baş tutdu.

Dünən Ramiz Rövşənin üç kitabının imza günü "Libraff” kitab mağazısında oldu. Girişdə ilk şair Əjdər Olu gördüm. Salamlaşdıq, daha sonra hara getdisə, bir də gözümə dəymədi. Media nümayəndələrinin iştirakı ilə baş tutan bu imza gününə bir xeyli insan toplaşmışdı. Ancaq diqqətdən yayınmayan məqam isə bura yığışanların 90 faizi elə universitet qızları – yəni elə ərgən qızlar təşkil edirdi. Elə bildim bir partiya da oğlanlar olacaq. Ancaq məclisin sonuna qədər görülən o oldu ki, üç-dörd gənc oğlan vardı ki, onlar da elə sevgililərinin dalıyca gəliblər…Vəssəlam...
 


Çox gözəl hissdir, bu qədər xanım oxucun ola. Ramiz Rövşən də sevincindən az qala bu sözləri dilə gətirə, amma gətirmədi.

Şair məclisə daxil olanda xanımların qışqırtısı kitab evini lərzəyə gətirdi. Adəti üzrə Ramiz bəy də qoltuğa oturub, ilk elə kitablarından söz açdı.

İlk dəfə idi görürdüm ki, media mənsublarına belə qayğı, sayqı olsun. Jurnalistlər üçün ayrıca yer hazırlanmışdı və şairin kitablarından da hədiyyə olunmuşdu.

İmza gününə təşrif buyuranlar arasında tanınmış simaları görmək olardı.
 


Hər zaman gözümüz alışdığı üçlük yenə burda idi. Tanınmış alim Rafiq Əliyev, professor Qulu Məhərrəmli, Fazil Mustafa və s.

Şairin üç kitabından biri sevgi, ikisi uşaqlar üçün nəzərdə tutulduğundan balaca oxucular da imzalı kitablarını gözləyənlər arasında idilər…

Və Ramiz Rövşən oxucularına çatdırmaq istədiyi informasiyadan sonra zala müraciət edir ki, kimin sualı var…

Bir xanım mikrafonu alıb şairə elə sual verir ki, şair özünü itirir…

- Bu qədər sevgi şeirləri yazırsız, onlar hansı bəxtəvərə ithaf olunur?

Şair gülür və qızarır… Deyir ki, o bəxtəvər mənim evimdədir.

Zalda şəkil çəkən qızlar bu suala, bu cavaba gözəl naz-qəmzə ilə gülüş səpirlər.

Şair bir çox sualları cavablandırırarkən bir xanım oxucu da deyir ki, olarmı sizin ayrılıq şeirinizi sizinlə birlikdə oxuyaq…

Şair də deyir ki, qızım, ayrılıq şeirini bir oxusaq, o ayrılıq şeiri olmaz…

Bircə bildiyim şey odur ki, ora Ramiz Rövşən adına gəlinmişdi, şeir adına yox. Hər bir halda gözəldir. Şair üçün atılan hər bir addım təqdirə layiqdir…

OXŞAR XƏBƏRLƏR