Sergey Lavrov gedir - Onu kim əvəz edəcək? (ŞƏRH)

 

Bunu Qaynarinfo-ya açıqlamasında konfliktoloq Üzeyir Şəfiyev Rusiya XİN rəhbəri Sergey Lavrovun vəzifədən gedəcəyilə bağlı fikirlər fonunda onun yerinə kimlərin gətirilə biləcəyi barədə suala cavabında deyib.

Üzeyir Şəfiyev bildirib ki, Sergey Lavrov uzun müddətdir Rusiyada xarici siyasət idarəsinə rəhbərlik edir:

"O, 20 ildən çoxdur ki, bu postda çalışır. Bu mənada o, rəhbərlik etdiyi sahədə böyük təcrübəyə malikdir. Buna baxmayaraq, Lavrov etdiyi çıxışlarına görə, bəlkə də Rusiya tarixində ölkəsinin beynəlxalq arenada nüfuzdan düşdüyü müddətdə ən çox boykot olunan nazir olub. Dəfələrlə onun beynəlxalq tribuna və kürsülərdə çıxışları boykot olunub. Hətta ən ali beynəlxalq tədbirlərdə Lavrovun çıxışı zamanı əksər iştirakçılar zalı tərk ediblər. Çünki Lavrov təcrübəli xarici işlər naziri olsa da, Rusiyanın beynəlxalq imicinin vizyonu kimi qarşı tərəfdə diqqət yaratmayıb. Bu mənada onu heç də uğurlu nazir hesab etmirəm. Onun dövründə Rusiya beynəlxalq birlik tərəfindən təcrid və sanksiyalara məruz qalıb və bu sanksiyalar fonunda Lavrovun uğur hekayələri də az olub. O, mühafizəkarlığı, neoimperalist baxışları, ilhaqçı düşüncəsilə seçilib. Yəni Lavrov fövqəladə xidmətləri olan portret kimi xatırlanmayacaq".

 

Lavrovu kimlərin əvəzləyə biləcəyinə gəlincə, həmsöhbətimizin fikrincə, Rusiya kimi böyük ambissiyalara malik dövlətin XİN rəhbəri də təcrübəli, səriştəli diplomatlar içərisindən seçilməlidir:

"Amma Lavrovdan Rusiyanın xarici siyasəti üçün böyük neqativ, problemlərlə zəngin bir miras qalıb. Çətin ki, yeni gələn XİN rəhbəri qısa müddətdə Lavrovdan qalmış neqativ mirası aradan qaldıra bilsin. Lavrov region dövlətlərinə münasibətdə də qeyri-sağlam rəftarı ilə yaddaşlarda qalıb. Türk Dövlətləri Birliyinin yaranmasını o, qısqanclıqla qarşıladı. Erməni mənşəli Lavrov Azərbaycana qarşı da qeyri-sağlam mövqe sərgiləyib. Onun vaxtilə ortaya atdığı plan Azərbaycanın dövlət maraqlarına uyğun olmayan təkliflər paketindən ibarət olub".

Qeyd edək ki, Rusiya nəşrlərinin məlumatına görə, Rusiyanın xarici işlər naziri Sergey Lavrov bu il vəzifəsindən azad edilə bilər. Bildirilir ki, Rusiya Prezidenti Vladimir Putin Lavrovu istefaya göndərmək istəyir. 

Xatırladaq ki, lavrov 2004-cü ildən Xarici İşlər Nazirliyinə rəhbərlik edir. İstefaya göndərilməsi fonunda onu kimlərin əvəzləyəcəyinə gəlincə, "Telegram" kanallarının birində iddia olunurdu ki, Lavrovun yerinə müavinləri Mixail Qaluzinlə Andrey Rudenkonun namizədlikləri müzakirə olunub. Həmçinin, Xarici İşlər Nazirliyinə "prezident administrasiyasından bir nəfərin” rəhbərlik edə biləcəyi də istisna olunmur.