Sloveniyanın son buzlaqlarından biri olan Triglav buzlağı tamamilə yox olmaq təhlükəsi ilə üz-üzədir. Alimlər onun qalan kiçik buz parçalarının yaxın günlərdə əriməsinin mümkün olduğunu bildirirlər.
Qaynarinfo xəbər verir ki, Triglav buzlağı ölkənin milli simvolu sayılan və 2863,65 metr hündürlüyü ilə Sloveniyanın ən yüksək zirvəsi olan Triglav dağının şimal-şərq yamacında yerləşir.
XIX əsrin sonlarında buzlağın sahəsi 40 hektardan çox olub. 1946-cı ildə isə bu göstərici 14 hektara qədər azalıb. Son illərdə isə Triglav artıq tamhüquqlu buzlaq hesab ediləcək vəziyyətdə deyil, çünki yeni buz təbəqəsi formalaşmır.
Sloveniya Elmlər və İncəsənət Akademiyasının Anton Melik adına Coğrafiya İnstitutunun əməkdaşı Miha Pavşek bildirib ki, buzlağın son qalıqları bir neçə gün ərzində tamamilə yox ola bilər.
Alim qeyd edib ki, o, bu buzlağı 30 ildir müşahidə edir. Onun sözlərinə görə, bu il Triglav buzlağının mövcudluğunda mühüm mərhələnin sona çatması ehtimalı yüksəkdir.
İqlim dəyişikliyi vəziyyəti ağırlaşdırır
Mütəxəssislər buzlağın sürətlə əriməsində iqlim dəyişikliyinin də rol oynadığını bildirirlər. Ötən qış bölgəyə əvvəlki illərlə müqayisədə daha az qar yağıb. Qarın qeyri-adi dərəcədə erkən əriməsi nəticəsində buz qalıqları yay istisinə daha uzun müddət məruz qalıb.
Pavşekin sözlərinə görə, hətta buzlağın kölgədə və nisbətən qorunan ərazidə yerləşməsi də onun qalıqlarını xilas etməyə kifayət etməyib.
Avropanın müxtəlif bölgələrində buzlaqların sahəsi və həcmi azalır. Alimlər xüsusilə Avstriyadakı buzlaqların gələcəkdə əriməsinin Sloveniyadakı Drau və Mura çaylarının su axınına təsir göstərə biləcəyini vurğulayırlar.
Bu çaylar Sloveniyada kənd təsərrüfatı ərazilərinin suvarılmasında mühüm rol oynayır. Su axınının azalması Drau və Ptuy ətrafındakı əkin sahələrinə, eləcə də Mura bölgəsinin bir hissəsinə təsir göstərə bilər.
İsveçrə Alplarında da ciddi itki qeydə alınıb
Buzlaqların vəziyyəti İsveçrədə də narahatlıq doğurur. Bu il İsveçrə Alplarındakı buzlaqlar buz həcminin 5,5 faizini itirib. Bu, müşahidələr tarixində ən böyük azalmalarından biri kimi qiymətləndirilir.
Mütəxəssislər əsas səbəblər arasında istilik dalğalarını və qış aylarında yağıntıların az olmasını göstərirlər. Son beş ildə isə İsveçrədə buzun ümumi həcmi təxminən beşdə bir qədər azalıb.
Alimlər hesab edirlər ki, temperatur artımının və qış qarının azalmasının davam etməsi Alp buzlaqlarının uzunmüddətli mövcudluğunu daha da çətinləşdirəcək.
Aydın
Şərhlər