Ukrayna prezidenti Vladimir Zelenski bildirib ki, Florida ştatında Ukrayna və ABŞ nümayəndə heyətlərinin görüşləri zamanı əvvəllər Cenevrədə müzakirə olunmuş sənəd layihəsi yenidən işlənib.

Qaynarinfo xəbər verir ki, dövlət başçısının Facebook sosial şəbəkəsində yazdığına görə, ABŞ-da keçirilmiş bütün görüşlərdən sonra Ukrayna nümayəndə heyətinin ətraflı məruzəsi baş tutub.

"Rüstəm Umerov və Floridadakı danışıqlarda iştirak edənlər dialoqda Amerika tərəfinin əsas vurğuları barədə məlumat verdilər. İş Cenevrə sənədi əsasında aparılırdı və bu sənəd yenidən işlənildi”, – deyə Zelenski bildirib.

Bundan əlavə, Ukrayna prezidentinin sözlərinə görə, Ukrayna Silahlı Qüvvələrinin Baş Qərargah rəisi Andrey Qnatov Amerika tərəfdaşlarını cəbhədəki real vəziyyət barədə əhatəli şəkildə məlumatlandırıb.

"Kəşfiyyatların iştirakı ilə Amerika tərəfi ilə cəbhədə bu və ya digər addımların həyata keçirilməsi perspektivləri və atəşkəs halında Rusiya zərbələrindən və razılaşmaların pozulmasından müdafiə problemləri müzakirə olunub”, – prezident əlavə edib.

Zelenskinin qeyd etdiyinə görə, Ukrayna diplomatları Avropa ölkələrinin və Könüllülər Koalisiyasının digər iştirakçılarının qərarların hazırlanmasına substantiv şəkildə cəlb olunması üçün bütün tərəfdaşlarla aktiv işləyirlər.

"Mən komandaya Avropa liderləri və Stiv Uitkofla Parisdə keçirilmiş söhbətlər barədə məlumat verdim. Qeyd edirik ki, ruslar Amerika tərəfi ilə görüşlərin hazırlanmasını nəzərə alaraq artıq yeni dezinformasiya kampaniyalarına başlayıblar”, – Zelenski bildirib.

Dövlət başçısı həmçinin ABŞ prezidenti Donald Trampın komandası, eləcə də Avropa tərəfdaşları ilə maksimum konstruktiv işi davam etdirmək tapşırığını verib.

"Ukrayna kəşfiyyatı tərəfdaşlara Rusiyanın həqiqi niyyətləri və sanksiyaların yumşaldılması, eləcə də mühüm kollektiv Avropa qərarlarının bloklanması üçün diplomatik işi pərdələmək cəhdləri barədə bizdə olan məlumatları ötürəcək”, – Zelenski deyib.

O əmin edir ki, Ukrayna bütün diplomatik işi tam ciddi qəbul edir.

"Biz real sülhdə və təmin edilmiş təhlükəsizlikdə maraqlıyıq. Məhz belə bir marağı Rusiya tərəfdən sıxışdırmaq lazımdır və bu vəzifə yalnız tərəfdaşlarımızla birlikdə həyata keçirilə bilər”, – Zelenski vurğulayıb.

Onun sözlərinə görə, Ukrayna Təhlükəsizlik və Müdafiə Şurasının katibi Rüstəm Umerov ABŞ-la gələcək görüşlərin qrafikinin müəyyənləşdirilməsi üçün daimi əlaqədə olacaq.

UNIAN-ın məlumat verdiyi kimi, 23 noyabrda Cenevrədə Ukrayna nümayəndə heyətinin ABŞ nümayəndə heyəti və Almaniya, Fransa və Böyük Britaniya nümayəndələri ilə görüşləri baş tutub. Həmin görüşlər zamanı müharibənin başa çatdırılması üzrə 28 bəndlik Amerika təklifi müzakirə olunub.

Əvvəlcə Amerika planında Rusiyanın işğal etdiyi Ukrayna ərazilərinin, xüsusilə də Krım, Donetsk və Luqanskın Rusiya ərazisi kimi tanınması nəzərdə tutulurdu.

Eyni zamanda Xerson və Zaporojyenin işğal olunmuş hissələri də Rusiya nəzarətində qalır və bu bölgələrdə cəbhə xətti dondurulurdu. Həmçinin Ukraynaya Konstitusiyada NATO üzvlüyündən imtinanı təsbit etmək və Silahlı Qüvvələrin sayını 600 minlə məhdudlaşdırmaq təklif edilirdi.

Bununla belə, danışıqlarda iştirak edən, Ukrayna Təhlükəsizlik və Müdafiə Şurasının katibi Rüstəm Umerovun qeyd etdiyi kimi, Cenevrədə amerikalılarla görüş zamanı ilkin "sülh planında” Ukraynanın əsas prioritetlərinin böyük hissəsini əks etdirmək mümkün olub.

30 noyabrda Floridada Ukrayna və Amerika komandalarının daha bir görüşü baş tutub. Mətbuatın məlumatına görə, ən çətin məsələlərdən biri Ukrayna və Rusiya arasındakı sərhədin gələcək taleyi olub.

1 dekabrda Zelenski bildirib ki, Rusiya əvvəlki razılaşmaları həmişə pozub və asanlıqla sülhü dağıdıb. Bunu nəzərə alaraq, Ukraynanın hazırkı məqsədi Rusiyanın sülhü yenidən pozmasının qarşısını alacaq təhlükəsizlik təminatları əldə etməkdir.

Bu gün, 2 dekabrda Moskvada ABŞ-ın xüsusi nümayəndəsi Stiv Uitkofun Rusiya tərəfi ilə görüşləri baş tutmalıdır.

Alpər