Dünya 16:18 02.04.2024

Ukrayna enerji obyektlərinə hücum üçün süni intellektli dronlardan istifadə edir – CNN

Ukraynanın Rusiya neft emalı zavodlarına hücumları daha uzaq mənzilli dronlardan istifadə etməklə və onların bəzilərini süni intellektlə (Sİ) təchiz etməklə mümkün olub.

Bu barədə Qaynarinfo CNN-ə istinadən xəbər verir.

Teleradioşirkətin yazdığı kimi, Ukrayna Rusiyanın nəhəng neft və qaz sənayesini hədəfə almaqda davam edir, idxal qadağalarına və qiymət məhdudiyyətlərinə baxmayaraq, bu sahələr Rusiyanın hərbi maşını üçün ən böyük gəlir mənbəyi olaraq qalır. Ümumiyyətlə, hücumlar təkcə daha uzaq mənzilli dronların istifadəsi ilə deyil, həm də bəzi dronlara süni intellektin inteqrasiyası sayəsində mümkün olub. Sİ, öz növbəsində, dronların naviqasiyasına və radioelektron vastilərdən yayınmağa kömək edir.

"Müdaxilələr qarşısında dəqiqlik süni intellektin istifadəsi ilə təmin edilir. Hər bir PUA-da peyk və ərazi məlumatları olan bort kompüteri var. Uçuşlar müttəfiqlərimizlə əvvəlcədən müəyyən edilir və PUA uçuş planına əməl edir ki, bu da bizə hədəfləri bir metr dəqiqliklə vurmağa imkan verir”, - Ukraynanın pilotsuz uçuş aparatı proqramına yaxın olan CNN mənbəsi bildirib.

Kral Birləşmiş xidmətlər institutunun analitiki Noya Silviya, öz növbəsində, süni intellektin bir növü olan "avtonom görmə" haqqında danışıb. Onun sözlərinə görə, belə süni intellektlə təchiz edilmiş dron coğrafiyanı və hansı hədəfə doğru getdiyini müəyyən etmək üçün "öyrədilə” bilər. Eyni zamanda, PUA tamamilə avtonom olur və peyklərlə əlaqə saxlamağa ehtiyac duymur.

Dron müharibəsi və süni intellekt üzrə ekspert Kris Linkoln-Cons qeyd edib ki, texnologiya yalnız öz potensialının inkişafının ilkin mərhələsində olduğu üçün "intellekt” səviyyəsi hələ də çox aşağıdır.

Ukrayna Müdafiə Nazirliyinin Baş Kəşfiyyat İdarəsi (QUR) və Ukrayna Təhlükəsizlik Xidməti PUA-larda süni intellektdən istifadə ilə bağlı CNN-ə şərh verməkdən imtina ediblər.

CNN-nin ekspertlərinin qeyd etdiyi kimi, Ukrayna yanacaq anbarlarını hədəfləmək əvəzinə, xam neftin emal olunaraq yanacağa və ya digər törəmə məhsullara çevrildiyi emal zavodlarına diqqət yetirir. Bəzi məqsədlər üçün çox sayda Qərb texnologiyası tələb olunur ki, Rusiya üçün bunu əldə etmək çətindir. Ekspertlər hesab edirlər ki, hücumlar Rusiya iqtisadiyyatına Qərbin sanksiyalarından daha çox təsir göstərə bilər. 

Bu arada Ukrayna bildirir ki, hazırda Rusiyanın neft emalı gücünün 12%-i fəaliyyətsizdir. "Reuters” isə öz növbəsində bu rəqəmin artıq 14%-ə çatdığını bildirib.
Ukraynanın Rusiya neftayırma zavodlarına hücumu dünya bazarında neftin qiymətinin artmasına səbəb olub. Təkcə bu il Brent markalı neftin qiyməti təxminən 13% artıb. Bu da öz növbəsində Amerika Birləşmiş Ştatlarının narahatlığına səbəb olub.

Bir məmur CNN-ə deyib ki, ABŞ Rusiya daxilində hücumları təşviq etmir və buna icazə vermir.

"RBC Capital Markets” investisiya bankının əmtəə strategiyası üzrə qlobal rəhbəri Gelim Kroft qeyd edib ki, Ukrayna və ABŞ arasında imzalanmış saziş Rusiya enerji resurslarına hücumların qarşısını almaq üçün maliyyə və silah təminatını nəzərdə tutur. 

"Onlara vəd edilən silahları və pulu almasalar, Vaşinqtonla razılaşmaya riayət etmək üçün onların hansı stimulu olacaq ki?” - deyə Kroft əlavə edib.
Qeyd edək ki, bu ilin yanvarından başlayaraq Ukrayna Rusiyanın neft infrastrukturuna hücumları gücləndirib. Böyük neft emalı zavodlarına bir sıra hücumlar həyata keçirilib.

Qərb mediasının yazdığı kimi, ABŞ Kiyevi hücumları dayandırmağa çağırıb, çünki bu, dünyada neft və benzinin qiymətinin artmasına səbəb ola bilər, lakin Ukrayna rəsmilərinin qeyd etdiyi kimi, Rusiyanın neftayırma zavodları USQ üçün qanuni hədəfdir.
 
Nizami Bağırov