Qayanrinfo xəbər verir ki, ilk dəfə 2015-ci ildə "Mercedes-Benz"in flaqman modeli kimi yollara çıxan "Maybach S-Class" "Rolls-Royce Ghost" və "Bentley Flying Spur" kimi rəqibləri ilə rəqabətdə dizayn yenilikləri, geniş fərdiləşdirmə imkanları və yenilənmiş mühərrik texnologiyası ilə diqqət çəkir.

Böyüyən ön barmaqlıq və yenilənən dizayn dili

2027-ci il "Maybach S-Class" standart S-Class modelindən daha nəzərəçarpan vizual detalları ilə fərqlənir. Avtomobilin ön hissəsindəki xrom barmaqlıq əvvəlki nəsillə müqayisədə 20 faiz böyüdülüb. Barmaqlığın çərçivəsi və kapot üzərindəki "Mercedes" ulduzu işıqlandırılan konstruksiyaya malikdir.

Yenidən dizayn edilmiş S-Class ilə ortaq olan ön fənərlərdə çəhrayı-qızılı detallara və "Maybach" emblemlərinə yer verilib. Yan profildə standart uzun bazalı S-Class ilə müqayisədə təxminən 18 santimetr uzadılmış təkər bazası diqqət çəkir.

Avtomobilin ümumi uzunluğu 5,5 metrdən çoxdur. Model iki rəngli kuzov boyası seçimi, həmçinin 20 və 21 düymlük yeni döymə ərintili disklərlə təklif olunur.

MBUX Superscreen və fərdiləşdirmə proqramı

Salonun ön hissəsində bütün paneli əhatə edən MBUX Superscreen ekran arxitekturasına keçilib. Sistem 12,3 düymlük rəqəmsal cihazlar paneli, 14,4 düymlük mərkəzi məlumat-əyləncə ekranı və ön sərnişin üçün nəzərdə tutulan 12,3 düymlük əlavə ekrandan ibarətdir.

"Mercedes-Maybach" "Manufaktur" və "Manufaktur Made to Measure" fərdiləşdirmə proqramları çərçivəsində seçim imkanlarını genişləndirib. Müştərilərə interyer üçün 400-dən çox rəng kombinasiyası və kuzov üçün 150-dən artıq boya seçimi təqdim olunur.

Arxa kabində komfort və texnoloji təchizat

Modelin arxa kabinəsində xüsusi hazırlanmış uzanma funksiyalı oturacaq sistemi quraşdırılıb. Dik vəziyyətdə təxminən 1,2 metr diz məsafəsi təmin edən oturacaqlar tam uzanıqlı vəziyyətə gətirilə bilir.

Arxa sərnişin bölməsi inteqrasiya olunmuş soyuducu, xüsusi dəri yastıqlar və baş dayaqları ilə təchiz edilir.

Güc aqreqatları: yeni V8 və V12 seçimləri

2027-ci il "Mercedes-Maybach" S-Class iki mühərrik variantı ilə satışa çıxarılacaq.

"Maybach S 580" modeli yüngül hibrid dəstəkli, düz dirsəkli vala malik yeni 4,0 litrlik iki turbomühərrikli V8 mühərriklə təchiz edilir. Əvvəlki V8 mühərriklə müqayisədə gücü 34 at qüvvəsi artırılaraq 530 at qüvvəsinə çatdırılıb. Avtomobil 0-dan 100 km/saat sürətə 3,9 saniyəyə yığır.

Seriyanın zirvəsində yer alan "Maybach S 680" isə 621 at qüvvəli 6,0 litrlik V12 mühərrikini qoruyub saxlayır.

Sürüş dinamikası və yürüş sistemi

"Airmatic" adaptiv pnevmatik asqı sistemi ilə təchiz olunan avtomobildə komfortu artırmaq üçün altı fərqli sürüş rejimi təqdim edilir.

Arxa oxun idarəolunması sistemi yüksək sürətlərdə hərəkət sabitliyini artırır. Şəhər daxilində isə arxa təkərlərin istiqamətləndirilməsi dönmə radiusunu azaldaraq avtomobilin manevr imkanlarını yaxşılaşdırır.

Aydın