“Range Rover”i Elşad Kəlbəliyevin sürdüyü təsdiqləndi - Həbs edildi (YENİLƏNİB)

Nazirliyin mətbuat xidmətindən Qaynarinfo-ya verilən məlumata görə, iyunun 14-də gecə saat 1 radələrində Binəqədi rayonunun Novxanı bağlar sahəsində Abşeron rayon sakini Elşad Kəlbəliyevin idarə etdiyi "Range Rover” və Bakı şəhər sakini Murad Ziyadovun idarə etdiyi "Daewoo Damas” markalı avtomobillər toqquşub.

Nəticədə M.Ziyadov və sərnişinləri - paytaxt sakinləri Kamran Əhmədov, Elman Şıxəliyev və Tovuz rayon sakini Yunis Mürsəlov hadisə yerində ölüb, E.Kəlbəliyev və sərnişini Ə.Əliyevə xəstəxanada tibbi yardım göstərildikdən sonra Binəqədi RPİ-yə gətiriliblər.

Araşdırma aparılır.

 

 

"Sonradan araşdırmalar zamanı məlum olub ki, avtomobili Elşad Kəlbəliyev sürüb və həmin zaman ağır sərxoş vəziyyətdə olub. Qəza baş verəndən sonra Ələsgər Əliyev xəstəxanaya zəng edərək qəzaya düşdüklərini deyib və təcili tibbi yardım xidməti göndərilməsini istəyib. Buna görə də ilkin olaraq sürücü kimi Ələsgər Əliyev qeydə alınıb. Hazırda Elşad Kəlbalayev istintaqa cəlb edilərək həbs olunub".

 

Dünən Novxanı-Sumqayıt yolunda "Qurtuluş 93” yaşayış kompleksinin sahibi Məhərrəm Novruzovun kürəkəni Elşad Kəlbəliyevin düşdüyü və dörd nəfərin vəfat etdiyi qəza ilə bağlı rəsmi açıqlama verilib.

Qaynarinfo xəbər verir ki, DİN Mətbuat xidmətindən "Qafqazinfo”nun sorğusuna cavab olaraq bildirilib ki, hadisə zamanı "Range Rover”i E. Kəlbəliyev yox, Ələsgər Əliyev idarə edib: "İyunun 14-ü gecə saat 01 radələrində Novxanı bağlar sahəsində Ələsgər Əliyevin idarə etdiyi "Range Rover” markalı 10 CO 002 nörməli  avtomobillə Bakı şəhər sakini Murad Ziyadovun idarə etdiyi "Daeewo Damas” markalı avtomobillər toqquşub: "Yol-nəqliyyat hadisəsi nəticəsində "Daeewo” markalı avtomobilin sürücüsü M.Ziyadov və sərnişinləri – paytaxt sakinləri Kamran Əhmədov, Elman Şıxəliyev və Tovuz rayon sakini Yunis Mürsəlov hadisə yerində ölüb.

"Range Rover” markalı avtomobilin sahibi və sərnişini Elşad Kəlbəliyev, sükan arxasında olan Ələsgər Əliyevə xəstəxanada ilkin tibbi yardım göstərildikdən sonra Binəqədi rayon Polis İdarəsinə gətiriliblər. Hazırda araşdırma aparılır”.

Qeyd edək ki, ilkin yayılan məlumata görə, "Range Rover” markalı avtomobili Elşad Kəlbəliyev sərxoş vəziyyətdə idarə edərkən piyadanı vurub, daha sonra hadisə yerindən qaçarkən "Damas”la toqquşub. Lakin rəsmi məlumatlarda avtomobili Ələsgər Əliyevin idarə etdiyi və vəfat edən 4 nəfərin "Damas”da olduğu qeyd edilib.

 

Onu da qeyd edək ki, xəbəri ilk olaraq APA yayıb.