8-ci “Zirvə Oyunları” Astaradakı universal basketbol arenasının açılışı ilə start götürdü (FOTO/VİDEO)

Qırmızı lent kəsiləndən sonra zalda qısa gəzinti təşkil edilib. Başçı Qəzənfər Ağayevə məlumat verilib ki, yeni arenanın 600 nəfərlik tamaşaçı tutumu var. Əsasən basketbol matçları üçün nəzərdə tutulan arenada kiçik yaşlı idmançılar ən yüksək səviyyəli şəraitdə məşqlər edə, oyunlar təşkil edə, yüksək ixtisaslı məşqçilərin rəhbərliyi altında beynəlxalq yarışlara hazırlaşa bilərlər. Bununla yanaşı, burada uşaq atletikası, kamandan oxatma, qılıncoynatma, badminton, stolüstü tennis, karate, taekvondo, voleybol və digər növlər üzrə yarışların keçirilməsi mümkündür.

Arena çoxfunksiyalı bazada yerləşir. Burada 150 nəfərlik yarış və 20 nəfərlik ağır atletika məşq zalı, bütün şəraitlə təmin olunmuş paltardəyişmə otaqları, SPA mərkəzi, həmçinin ən müasir avadanlıqlarla təchiz olunmuş geniş AAAF Fitness zalı, 50 nəfərlik yeməkxana və digər otaqlar idmançıların istifadəsinə verilib.

Qeyd olunub ki, zal bu yay keçirilməsi nəzərdə tutulan Ümummilli lider Heydər Əliyevin anadan olmasının 97-ci ildönümünə həsr olunan 8-ci Zirvə Beynəlxalq İdman Oyunlarının əsas yarış meydançasına çevriləcək. Açılış gününün də məhz Ulu öndərin doğum gününə təsadüf etməsi onun xatirəsinin bir daha yad edilməsi, ölkəmizin bu günü və gələcəyi üçün etdiklərinə görə bir təşəkkür kimi başa düşülməlidir.

Açılış mərasimi dünyada tüğyan edən pandemiya səbəbindən tətbiq edilən xüsusi rejim qaydalarına riayət edilərək həyata keçirilib. Qoruyucu vasitələrdən yararlanılıb, sosial məsafə saxlanılıb, kütləvi toplaşma limiti gözlənilib. Çıxış üçün söz ilk olaraq Astara Rayon icra Hakimiyyətinin başçısı Qəzənfər Ağayevə verilib. O, hisslərini belə ifadə edib: "Bu gün həqiqətən də özəl bir gündür və məhz bu gün belə gözəl bir zalın açılışı bizim hamımızı sevindirir. Bildiyiniz kimi, koronavirus pandemiyası səbəbindən biz bu tədbiri daha təmtəraqlı edə bilmədik. Ancaq əminəm ki, gələcəkdə burada keçiriləcək böyük yarışlar zamanı hər kəs bu günün dəyərini anlaya biləcəkdir. Bu gün anadan olmasının 97-ci ildönümünü qeyd etdiyimiz Ulu öndər Heydər Əliyev daima gənclərin qayğısına qalıb və idmana himayəsini əsirgəməyib. Onun bu siyasətini hazırda cənab prezident İlham Əliyev davam etdirir. O, idmanın inkişafına öz dəstəyini verir, böyük qayğı göstərir. Bu möhtəşəm idman zalının tikilməsində əziyyəti olan hər bir kəsə, xüsusilə də "Zirvə” Beynəlxalq İdman Klublarının prezidenti Tofiq Heydərova bu işinə görə təşəkkür edir, dərin minnətdarlığımı bildirirəm. Xeyirli və uğurlu olsun, daima qələbə səsləri eşidilsin”.

Daha sonra "Zirvə” BİK-in prezidenti Tofiq Heydərov çıxış edib: "Hörmətli, Qəzənfər müəllim, əziz idmançılar. Sizləri salamlayır, xoş gəlmisiniz deyirəm. Bildiyiniz kimi, bu ilin may ayı üçün nəzərdə tutduğumuz 8-ci Zirvə Beynəlxalq Uşaq Oyunları məlum səbəblərdən bir qədər başqa formatda keçirilir. İlk olaraq bütün karantin qaydalarına riayət etmək şərtilə basketbol və uşaq atletikası yarışlarına start verdik. Hər il yarışlarımızda daha çox idmançı iştirak edir. Bütün çətinliklərə baxmayaraq, bu il də istisna olmayacaq. Yarışları ilboyu təşkil edərək daha çox iştirakçıya şans vermək imkanı əldə edəcəyik. Bildiyiniz kimi, bu yarışlar ümummilli lider Heydər Əliyevin əziz xatirəsinə həsr edilib. Mən özüm Azərbaycanı beynəlxalq yarışlarda təmsil edən ilk idmançılardan olmuşam. Ovaxtlar – 90-cı illərin əvvəllərində bizim nəinki təlim-məşq toplanışlarını etməyə, heç adi məşq etməyə belə zalımız yox idi. Öz vəsaitimiz hesabına dünya və Avropa çempionatlarında iştirak edirdik. Ümummilli liderin 1995-ci ildə biz idmançılarla görüşündən sonra idmana qayğını öz üzərinə götürməsi böyük bir stimul oldu, ölkənin idman həyatında böyük dəyişikliklər başladı. 1997-ci ildə cənab prezidentimiz İlham Əliyev Milli Olimpiya Komitəsinin prezidenti seçiləndən sonra biz daha da sürətləndik. Və hazırda Azərbaycan dünyada bir idman ölkəsi kimi tanınır. İstər idman qurğularının inşası, istərsə də yarışların təşkili baxımından hər il ölkəmiz böyük uğurlara imza atır. 2019-cu ilin yekunları ilə əlaqədər keçirdiyi iclasda çıxış edən prezident İlham Əliyev sağlamlığın vacibliyin önə çəkdi və rayonlarda, kəndlərdə idmanın inkişafı etdirilməsinin böyük əhəmiyyət daşdığını deyərək, müvafiq tapşırıqlarını verdi. Bu da prezidentimizin idmana necə həssas yanaşmasının bir təsdiqidir. Biz də bundan sonra qərara aldıq ki, 8-ci Zirvə Beynəlxalq Uşaq Oyunlarının yalnız bir şəhərdə yox, həmçinin kəndlərdə də təşkil edək. Bugün bu basketbol arenasının açılışı bizləri çox sevindirir. Bilirsiniz ki, bu il böyüklər arasında basketbol Superliqasının qalibi məhz bu şəhəri – Astaranı təmsil edən "Zirvə Astara” komandası oldu. Mən komandanın bütün üzvlərini təbrik edirəm. Qeyd etmək istərdim ki, komanda legionerlər və digər şəhər və rayonlarının nümayəndələrindən təşkil olunub. İnanıram ki, bu kimi zalların açılışından sonra yerli – astaralı idmançılar da zirvələrə doğru irəliləmək, çempion komandada yer almaq, qalib olaraq ölkəmizi beynəlxalq arenada layiqincə təmsil etmək şansı qazanacaqlar. Mən bir daha bu arenanın inşasında əməyi keçən insanlara, həmçinin Astara RİH-nin rəhbərliyinə dərin minnətdarlığımı bildirir, bütün idmançılara uğurlar arzulayıram”.

Daha sonra Tofiq Heydərov 8-ci Zirvə Beynəlxalq Uşaq Oyunlarını rəsmi şəkildə açıq elan edib. Azərbaycan Respublikasının Dövlət Himni səslənib.

Bu zaman Zirvə Beynəlxalq İdman Klublarının və Azərbaycan Respublikasının Dövlət Bayrağı qaldırılıb. Bayraqdar rolunda 7-ci Zirvə Beynəlxalq Uşaq Oyunlarının qalibləri Aylin Həsənli və Məmmədəli Qasımov çıxış ediblər.

Sonra yarışlara start verilib. İdmançılar səbətə top atmada qüvvələrini sınayıblar. Hər bir gənc basketbolçu 1 dəqiqə ərzində maksimum sayda topu səbətdən keçirməyə və qalib olmağa çalışıblar.