Azərbaycan Həkimləri İB COVİD-19 III dalğası ilə bağlı bəyanat verdi

Azərbaycan Həkimləri İB COVİD-19 III dalğası ilə bağlı bəyanat verdi

Azərbaycan Həkimləri İctimai Birliyi COVİD-19 üçüncü dalğasının yayılması ilə əlaqədar bəyanat verib. 

Qaynarinfo xəbər verir ki, bəyanatda ölkəmizdə COVİD-19 pandemiyasının dünyada rəsmən elan edilən 3-cü dalğasının yaşandığı qeyd edilib:

"Son günlərdə COVİD-19 xəstəliyinə yeni yoluxma hallarının kəskin artması ilə əlaqədar tibb xidməti işinin təşkilində ciddi problemlər yaranıb. 2-ci dalğada ortaya çıxan çətinliklər indi də hiss olunmaqdadır. AHİB istər ölkə üzrə əhali sayına, istərsə də xəstələnənlərin sayına düşən ölüm hallarının başqa ölkələrə nisbətən yüksək olması faktından narahatlıq ifadə edir və aşağıdakı tədbirlərin görülməsini zəruri sayır: 

1. COVİD-19 pandemiyası sürəci boyu dünya təcrübəsi göstərdi ki, yeni yoluxma hallarının qarşısını almaq və epidemioloji vəziyyətə nəzarət üçün əsas tədbirlərdən biri kütləvi testləşdirmənin aparılmasıdır. Əksər ölkələrdə (Çin Xalq Respublikası, Cənubi Koreya və Yaponiyada) bu təcrübə çox effektli oldu. Ölkəmizdə də COVİD-19 xəstəliyini vaxtında aşkar edib yoluxanları izolyasiya etmək məqsədilə test sayının artırılması təmin edilməlidir.

 2. Test üçün müraciət eədn şəxslərə heç bir vəchlə məhdudiyyət qoyulmamalıdır (məs., test edilmək üçün hərarətin 38°C-dən yuxarı olması və s. tələb olunur). Hərarəti olub olmamasından asılı olmayaraq, təcili tibbi yardıma, poliklinika və stasionarlara müraciət edən şübhəli şəxslərdən və test analizi müsbət çıxmış şəxslərlə təmasda olduğu şəxslərdən test analizinin götürülməsini təmin etmək zəruridir. Uşaq poliklinikalarında uşaqların test edilməsi təmin edilməlidir. 

3. Kütləvi peyvəndləmənin dünya təcrübəsindən yararlanmaq lazımdır. Müxtəlif mülkiyyətli tibb müəssisələrində, məntəqələrində, geniş iş yerlərində, iri marketlərdə vaksinasiya guşələri yaratmaqla peyvəndləmə işinin kütləviliyi təmin edilməlidir.

 4. Əhali arasında kütləvi sayda ev (ambulator) müalicəsi alanların olduğu, reseptlərdə antibiotiklərin, antiviral dərmanların yerli-yersiz istifadəsinə son qoyulmalıdır. ÜST protokolları əsasında müalicə prinsipləri elmi baxımdan tibb ictimaiyyətinə mütəmadi izah edilməli, əhali arasında maarifləndirmə işini gücləndirilməlidir. 
5. Təcili tibbi yardım işçilərinin Prezident sərəncamı və Nazirlər Kabinetinin müvafiq qərarı əsasında maaşlarına nəzərdə tutulan əlavələr yanvar ayında təqribən 50% azaldılaraq verilib, fevral-mart ayları üzrə verilməsi isə indiyədək təmin olunmayıb. COVİD-19-dan dünyasını dəyişən tibb işçilərinin xatirəsi indiyə qədər əbədiləşdirməyib və ailələrinə kompensasiya verilməyib. Bu məsələ ilə bağlı hökuməti təcili tədbirlər görməyə çağırırıq”. 

Bahar Rüstəmli
  • Tərəfdaşların xəbərləri
XƏBƏRLƏR
BLOGLAR