Axşam.az-ın məlumatına görə, onlar aparıcı Kazım Sübhanın 106.3 FM-də yayımlanan "Xatirələr nə gözəldir" proqramına ilk sevdikləri şəxslə bağlı açıqlama veriblər.

Nadir Qafarzadə - Uşaqlıq illərinin məhəbbəti üçün ağlamamışam. Bizə deyirdilər, qızımı sənə verəcəm. Xalam qızına vurulmuşdum, əsgərlikdə eşitdim ki, nişanlanıb. Getdiyi oğlan məndən nə imkanlı, nə də qəşəng idi. Gəlib pis oldum.

Abbas Bağırov - 7-ci sinifdə sevirdim. Özümdə düşünürdüm ki, qız elə düşünür ona yaraşmıram. O qədər gözəl idi ki... İllər keçəndən sonra eşitdim ailə həyatı qurur, pis oldum. Uşaqlıq sevgisi idi.

Sevda Yahyayeva - Acı xatirə deyil. Uşaqlıqda elə bilirsən sevirsən. Amma böyüyəndə görürsən ki, bu sadəcə xoşlanmaq olub.

Zamiq Hüseynov - İlk sevgim 18 yaşımda olub. O vaxt məşhur deyildim. Birini sevirdim, elə bilirdim o da sevir. Vaxt keçdi anladım ki, məni yox, varlı birini sevir, kübar həyat istəyir. O da məndə yox idi.

Natavan Həbibi - 6-cı sinifdə mənə eşqini etiraf edən oğlan o qədər diqqətli, mədəni, tərbiyəli idi ki... 12 yaşı var idi, hər gün mənim qapıma çiçəklər, şokoladlar qoyurdu. Hər səhər qapımı açanda bunları görürdüm. Bütün məktəb bilirdi ki, biz bir-birimizi sevirik. Ailəsi də bilirdi bunu. Hətta bizim ailəmizlə tanış olmuşdular. Biz Türkmənistandan Azərbaycana, onlar isə Almaniyaya köçdü. Əlaqə saxlaya bilmədik, heç yerdə görmədim onu.

Sevda Ələkbərzadə - Şəxsi həyatdan danışmıram, bu da eynən. Bölüşmək istəmirəm.

Vüqar Əbdülov - Uşaq yaşımda düşünürdüm ki, nişanlım var. Kimisə sevəcəmsə, bu valideynlərimin göstərəcəyi qız olacaq. Heç vaxt sevgi axtarmadım. Uşaqlıq eşqim də olmadı. Amma ailəmin tapdığı ilə də alınmadı. Sonra böyüdüb, amma sevdiyim yox idi. Təhsil almaq idi planım. Kasıb ailədə böyüdüm. Həmin qızın getdiyi ailə isə zəngin idi. Mən də başladım deməyə ki, qazanacam, varlı olacam. Özüm heç vaxt sevmədim. Ailəm elçi getdi, seçdi. İndi isə uşaqlarımın anası ilə xoşbəxtəm.

Xəyyam Nisanov - İlk məhəbbətim bağçada başladı. O qədər ona vurğun idim ki, oradakıların ona yaxınlaşmasına imkan vermirdim. Anamı çağırdılar ki, bunu bağçadan çıxarın. Üzbəüz bağçaya keçirdilər. Bir gün ordan qaçıb gəldim qızın yanına. Sonra həmin qız mənimlə eyni sinifə gəldi. Altıncı sinifdə isə başqa məhəbbət tapdım. Məktəb bitəndən sonra bir-birimizi itirdik.

Namiq Qaraçuxurlu - Əgər bir insanla ailə qurursansa, son nəfəsinə kimi yaşayırsansa, sevgidir. İndi düşünürəm ki, mənim sevgim ailəmdir.

Elnarə Xəlilova - Birini məktəb vaxtı sevirdim. Bilirdim ki, mən bu oğlana vurulmuşam. Onun dəniz mavisi gözlərindən gözümü çəkə bilmirdim. Ona baxıb xəyallara dalırdım. Sonra həmin məktəbdən ayrıldım.