MTRŞ-in rəsmi səhifəsində 23 aprel 2019-cu il tarixdə Milli Televiziya və Radio Şurasının növbəti iclası keçirildiyi, İclasda "Real Təhlil İnformasiya Mərkəzi” MMC-yə ümumrespublika televiziya yayım kanalının açılması üçün (Bakı şəhəri və Abşeron yarımadası ərazisində SD yayım üçün 48-ci, HD yayım üçün 37-ci TV yayım kanalı olmaqla) ümumrespublika televiziya yayımı üçün MÜDDƏTSİZ lisenziya verilməsinin qərara alındığı bildirilib.

MTRŞ müddətsiz lisenziya verə bilərmi? Əsas sual budur. Qanunlar MTRŞ-a bu hüququ vermir.

Teleradio sahəsini tənzimləyən xüsusi qanun - Televiziya və radio yayımı haqqında Azərbaycan Respublikasının Qanunudur. Qanunun 22-ci maddəsi Xüsusi razılığın (lisenziyanın) qüvvədə olma müddətini müəyyən edib: "22.1. Ərizədə daha az müddət göstərilməyibsə, xüsusi razılıq (lisenziya) 6 il müddətinə verilir. Bu müddətdə ayrılan tezlikdən istifadə texniki baxımdan mümkün deyilsə, xüsusi razılıq (lisenziya) daha az müddət üçün verilə bilər.”

Görüldüyü kimi lisenziya müddəti maksimum 6 il müddətinə verilə bilər.

Lisenziyalara dair əsas qanunvericilik aktı hesab olunan "Lisenziyalar və icazələr haqqında” Azərbaycan Respublikasının 2016-cı il 15 mart tarixli 176-VQ nömrəli Qanunu da bəzi lisenziyaların müddətsiz olmasını qəbul etsə də istisnalar olduğunu bildirib və qeyd edib ki: "Azərbaycan Respublikasının qanunlarında müddət müəyyən edilməyibsə, icazələr müddətsiz verilir.” Qanun aydın şəkildə deyir ki, başqa qanunda lisenziya üçün müəyyən olunan müddət varsa, o tətbiq edilməlidir.

MTRŞ-i çaşdıran yəqin ki, Azərbaycan Respublikası Prezidentinin 21 dekabr 2015-ci il tarixdə imzaladığı № 713 saylı Lisenziyalaşdırma sahəsində bəzi tədbirlər haqqında Fərmandır. Lakin dörd ciddi məqam qarışdırılıb.

Birincisi, Prezidentin Fərmanı konkret İcra Hakimiyyəti orqanları tərəfindən verilən lisenziyalara aiddir. MTRŞ özü qəbul etməsə də, icra orqanı yox, dövlət orqanıdır. Qanun MTRŞ-ı dövlət orqanı olaraq nəzərdə tutub.

İkincisi, Fərmanın imzalandığı 2015-ci ildən sonra müvafiq sahədə yeni Qanun qəbul edilib. Bu "Lisenziyalar və icazələr haqqında” Azərbaycan Respublikasının Qanunudur. Həmin Qanun Fərmandan fərqli tənzimləmə gətirib və yuxarıda 22-ci maddənin tələbini vurğuladım.

Üçüncüsü, Konstitusiyanın 148-ci maddəsində qanunlar fərmanlardan üstün hesab edilir və 149-ci maddənin (normativ hüquqi aktların qüvvəsi) IV bəndində: "IV. Azərbaycan Respublikası Prezidentinin fərmanları Azərbaycan Respublikasının Konstitusiyasına və qanunlarına zidd olmamalıdır”- deyilir.

Dördüncüsü, 21 dekabr 2010-cu il tarixli, № 21-IVKQ tarixli Normativ hüquqi aktlar haqqında Azərbaycan Respublikasının Konstitusiya Qanuunnun 2.6 maddəsi: "Fərman və ya digər normativ hüquqi akt qanunla ziddiyyət təşkil etdikdə qanun tətbiq edilir- deyərək, əslində MTRŞ-ın necə davranmalı olduğunu göstərib.

Bütün bu saydığım normalar MTRŞ-ın son verdiyi lisenziyanı müddətsiz verməklə qanunvericiliyin şərtlərini açıq pozduğunu göstərir. Bundan öncəki lisenziya müddəti bitən yayımçıların lisenziyalarının uzadılması zamanı da bu yanlış addım atılıb və qanunvericiliyin tələbi pozulub.

MTRŞ dərhal nədən qanunvericiliyi pozaraq belə bir addım atdığını əsaslandıran açıqlama vermək məcburiyyətindədir. Təbii ki, yalnız qanunlara isnad edrək!