Azərbaycan alimlərindən ibarət musiqi ansamblı yaradılacaq

Azərbaycan alimlərindən ibarət musiqi ansamblı yaradılacaq

Azərbaycan Milli Elmlər Akademiyası (AMEA) Azad Həmkarlar İttifaqının (AHİ) Məclisinin növbəti iclası keçirilib.

AMEA-dan Qaynarinfo-ya bildirilib ki, iclası AHİ-nin sədri, hüquq elmləri doktoru, professor Habil Qurbanov açaraq rəhbərlik etdiyi qurumun 2019-cu ildə gördüyü işlərdən danışıb. Bildirib ki, ötən dövr ərzində akademiya əməkdaşlarının pulsuz tibbi müayinəsi həyata keçirilib, mütəmadi ərzaq yarmarkaları təşkil olunub, teatrlara, istirahət düşərgələri və sanatoriyalara göndərişlər verilib, aztəminatlı ailələrə ərzaq paylanılıb. Habelə 20 Yanvar faciəsi və Xocalı soyqırımına, Qadınlar və Qızlar Elmdə Beynəlxalq Gününə və s. həsr olunan silsilə tədbirlər keçirilib.

Habil Qurbanov cari ildə əməkdaşların asudə vaxtlarını səmərəli keçirmələri üçün "Akademiya şəhərciyi”nin həyətində AHİ-nin maliyyə dəstəyi ilə hazırlanan voleybol və basketbol meydançasının istifadəyə verildiyini söyləyib. O, bu idman növlərinin 2020-ci ildə AMEA-nın ilk təşkilatları arasında keçiriləcək III Spartakiadaya salınmasının nəzərdə tutulduğunu vurğulayıb.

AHİ-nin sədri, həmçinin AMEA əməkdaşlarından ibarət musiqi ansamblının yaradılmasının planlaşdırıldığını bildirib.

İclasda daha sonra AMEA İşlər İdarəsinin müdir müavini Sərdar Əliyev Xızı Dayaq Məntəqəsində akademiya əməkdaşlarına paylanılan torpaq sahələrindən istifadəyə nəzarətin gücləndirilməsi barədə çıxış edib. Bildirib ki, akademiya əməkdaşlarının sosial vəziyyətinin yaxşılaşdırılması və səmərəli istirahətinin təşkili məqsədilə AMEA-nın "Xızı” Kənd Təsərrüfatı İstehsalat Kompleksinin balansından torpaq sahəsi ayrılıb. O, ərazidə aparılan işlərin Rəyasət Heyətinin iclasında təsdiqlənmiş "AMEA əməkdaşlarına bağçılıq-bostançılıq məqsədilə müvəqqəti istifadə üçün torpaq sahəsinin ayrılması və ondan istifadə olunması Qaydaları” haqqında sənədə əsasən həyata keçirildiyini deyib. Diqqətə çatdırıb ki, ötən müddət ərzində ərazidə xəritələnmə işləri aparılaraq torpaqlar paylanılıb, giriş yolu salınıb, su quyuları qazılıb, müəyyən hasarlanma işləri həyata keçirilib. Hazırda ərazidə relyefə uyğun ağaclar əkilməsi planlaşdırılır.

S.Əliyev mövcud çatışmazlıqlardan da bəhs edərək, elmi müəssisə və təşkilatların ümumi işlər üzrə direktor müavinlərini problemlərin həllinə dəstək verməyə çağırıb.

Daha sonra çıxış ətrafında müzakirələr aparılıb, suallar cavablandırılıb.

İclasda, həmçinin Respublika Seysmoloji Xidmət Mərkəzinin, Yüksək Texnologiyalar Parkının və "Elm" nəşriyyatının həmkarlar təşkilatlarında seçilmiş yeni sədrlərin Məclisə üzvlüyü təsdiqlənib.

Sonda bir sıra cari məsələlər müzakirə olunub.
 

XƏBƏRLƏR
BLOGLAR