Ekspert: “Yollarda tıxacın yaranma səbəblərindən biri xüsusi avtobus zolağının olmamasıdır”

Nəqliyyat üzrə ekspret Natiq Nazimoğlu avtosfer.az saytına verdiyi açıqlamada bildirib ki, avtobuslar üçün ayrıca hərəkət zolaqlarının yaradılması yollarda tıxacın qarşısının alınması üçün ən effektiv tədbirlərdən biridir:

"Avtobuslar üçün ayrıca bir zolaq olmadığından minik avtobuslarını yoxlayanda avtobusların da hərəkəti ləngiyir. Ayrıca zolaq olsa avtobus da bir nöqtədən digərinə vaxtında çatar. Yollarda qurulan postlarda bütün nəqliyyat vasitələri üçün yalnız bir keçid dəhlizi qoyulur ki, bu da avtobusların hərəkət axınına maneə olur. Düşünürəm ki, əlavə sarı zolaq çəkilməli və avtobuslar onlar üçün ayrılmış hissədə hərəkət etməlidirlər. Bəzi xarici ölkələrdə yollarda bu məqsədlə dəmirdən sədlər çəkilir, səddin bir tərəfi ilə minik avtomobilləri, digər tərəfi ilə isə avtobuslar hərəkət edir. Yollarda tıxacın yaranma səbəblərindən biri avtobuslar üçün xüsusi zolağın olmamasıdır. Insanlar tıxacda qalacaqlarını və ləngiyəcəklərini düşündükləri üçün avtobusla deyil, şəxsi avtomobilləri ilə getməyə üstünlük verirlər. Bu isə tıxacı daha da artırır. Bakıda bir sıra iri prospektlər var ki, orada belə xüsusui zolaqların ayrılması mümkündür. Digər prospektlərdə xüsusi avtobus zolaqlarının yaradılmasının tıxaca səbəb olub-olmayacağını təhlil etmək lazımdır. Amma həmin iri yollarda ayrıca zolaqların yaranması tıxacın aradan qaldırılması isiqamətində böyük addım olar. Bu, avtobuslar arası intervalı azaldar, onların hərəkətini sürətləndirər və lazımı ünvana vaxtında çatmasını təmin edər. Vacib deyil ki, dəmir sddlər quraşdıraq. Əgər sarı zolaq çəkilsə hamı bilər ki, onun üzərinə çıxmaq olmaz və insanlar da getdikcə bütünlüklə buna riayət edərlər”.